27/04/2026
تسعير الشغل الهندسي . الحتة اللي بنكون قبلها اصحاب و بعدها بنتشاكل مع بعض . و الموضوع بصراحة فيهو كم نقطة عاوزين نناقشها
اول حاجة هي ليه الزبون لحد هس مفتكر انه في زرار كبيييير في شاشة البرامج الهندسية انت بتدوسو بيقوم يطلع ليك الشغل في لحظة . بيقولوها بالحرف (التصميم ده ما بيعملو ليك البرنامج ) هي أجي يعني البرنامج ده بيشتغل و بيفكر براهو مثلا ؟؟
كلكم بتكونوا سمعتوا قصة المهندس اللي صلح سفينة عطلانة بأنه ركب صامولة كانت مفكوكة في حتة و السفينة دورت و قام طلب 10 الف دولار . لمن اسياد السفينة دقوا جرس على التكلفة رسل ليهم تفاصيل فاتورة الصيانة طلعت
- تكلفة الصامولة 1 دولار
- تكلفة معرفة المكان اللي مفروض تركب فيه الصامولة 9999 دولار
يلا دي اسمها تكلفة الخبرة
الموضوع لو هو برنامج بيعمل شغل و خلاص فممكن اي واحد يمشي ياخد كورس برامج و يجي يصمم ليك بيتك . لكن صدقني البيت ده يوم واحد ما هتقدر تسكن فوقو . ده اصلا لو قدرت تبنيه
التصميم الهندسي قبل ما يهتم بالشكل الجمالي بيهتم بالأمان - التكلفة - التهوية - الخصوصية - المعايير الثقافية و المجتمعية - الراحة في الاستخدام - سهولة الحركة داخل المبنى .. وييييك حاجات لو قعدت اعدها ما هنخلص (ممكن تتموها انتو في الكومنتات)
اكيد كل مهندس في السوق هيكون عنده سعره . يعني الخريج الحديث ما هيتقارن باللي خبرته 20 سنة . لكن اتذكر انه غلطة صغيرة في مرحلة التصميم اللي انت مسترخصه ده يا عزيزي المالك . ممكن تدفع اضعافها اثناء التنفيذ لانك قررت تبحث عن الارخص و ليس عن الشغل الهندسي المظبوط اللي فيه خبرة
تفتكروا شنو الاسباب اللي بتخلي الملاك ما قادرين يدوا الشغل الهندسي قيمتو الحقيقية و شنو اللي ممكن نعمله عشان ننشر ثقافة وعي عند الملاك حول عدم اللجوء للاسترخاص لانه فعليا هو بيكلفو اكتر . شاركونا بآرائكم و انشرو البوست لناسكم عشان الفكرة توصل لأكبر عدد من الناس و يعرفوا انه المهندس دوره مهم
