24/07/2026
| PAG-INSTALL OG CCTV SA MGA HALLWAY UG CLASSROOM, GIREKOMENDA SA KAPULISAN
Giawhag sa kapulisan ang tanang tunghaan nga kon mamahimo, magbutang og High-Definition Closed-Circuit Television (HD CCTV) sa tanang classroom, lakip ang mga hallway ug gawas sa mga eskwelahan, aron makatabang sa pagsuta sa mga insidente ilabina sa mga alegasyon sa bullying.
Matud ni PMaj. Marc Hedssel Culaste, hepe sa Sta. Ana Police Station, iyang girekomenda ang pagbutang og CCTV sa tanang classroom, tungod dako ang matabang niini sa pag-backtrack sa mga insidenteng mahitabo sulod sa ilang area of responsibility, ilabina sa mga eskwelahan nga dunay mga kaso sa bullying tungod kon adunay mga alegasyon kun reklamo sa bullying, mahimong mabalikan ang CCTV footage aron makita ang tinuod nga nahitabo sa lugar sa insidente.
Giuyunan usab kini ni PMaj. Catherine Dela Rey, spokesperson sa Police Regional Office (PRO) 11, nga nag-ingon nga mas maayo nga adunay CCTV tungod mamahimo kining konkretong ebidensya nga mabalikan kaysa magsalig lang sa mga alegasyon kun gibutyag sa mga nalambigit sa insidente.
Kahinumduman nga niadtong Hulyo 22, nakadawat ug report ang Sta. Ana PNP nga dunay usa ka 8-anyos nga bata ang namatay tungod sa alegasyon bullying diin gidapatan kini sa iyang classmate, ug sa karon, nagpadayon pa sab ang imbestigasyon sa maong insidente aron masuta ang tinuod nga panghitabo. | via RadyoMaN Wil Duran
