30/06/2026
🏠"СЭРҮҮН" КОМПАНИЙН ТҮҮХИЙГ БҮТЭЭЛЦЭГЧИД #7
#Сэрүүн35Жил
Эрчим хүчний сургуулиас эхэлсэн карьер, Сэрүүн группын Америк дахь салбарт хуримтлуулсан 3 жилийн туршлага, хиймэл оюун ухаан ба ирээдүйн инженерийн чиг хандлага Сэдвийн хүрээнд бид залуу инженер Б.Баярмагнайтай ярилцлага хийлээ.
1. Та анхнаасаа HVAC инженер болно гэж зорьж байв уу, эсвэл энэ мэргэжил таныг сонгосон уу?
Анхнаасаа яг энэ чиглэлийг сонгоно гэж төлөвлөөгүй байсан. ШУТИС-ийн Эрчим хүчний сургуулийг дулааны инженер мэргэжлээр төгссөн юм. Гэхдээ суралцах хугацаандаа болон ажлын талбар дээр гараад ажиллах явцдаа HVAC салбарын сонирхолтой, өргөн далайцтай талуудыг олж харсан. Ингээд өөрийн сонирхолд хөтлөгдөн, энэ чиглэлээр гүнзгийрүүлэн мэргэшиж, тууштай ажиллахаар шийдсэн дээ.
2. Америкт ажиллаж байхдаа “Үүнийг л Монголдоо нутагшуулах юм сан, хэрэгжүүлэх юм сан” гэж хамгийн их бодогдсон зүйл юу байв?
Америкийн барилгын салбарын хамгийн том давуу тал нь "Стандартын ягштал биелэлт". Тэнд барилгын зураг төсөл, угсралтын ажил бүр тухайн хотын норм дүрэм, хатуу шаардлага болон архитектурын төлөвлөлтийн дагуу яг таг хийгддэг. Хэн нэгэн дарга эсвэл захиалагч дур мэдэн шийдвэр гаргаж, стандартыг өөрчилдөггүй. Бүх зүйл хууль, дүрмийн дагуу явдаг нь хотыг эмх цэгцтэй, урт хугацаанд зөв, тогтвортой хөгжих үндэс болдог. Үүнийг л эх орондоо маш их үгүйлж, хэрэгжүүлээсэй гэж хүсэж байлаа.
3. Америкт ажилласан 3 жилийн хугацаа таныг инженерийн хувьд хэрхэн өөрчилсөн бэ?
Надад сэтгэлгээний маш том өөрчлөлт авчирсан. Ялангуяа хиймэл оюун ухаан (AI) болон орчин үеийн шинэ технологиуд инженерийн ажлын салшгүй нэг хэсэг, хүчтэй зэвсэг болж байгааг дэргэдээс нь мэдэрч, ойлгосон. Тиймээс өнөөдрийн инженер хүн зөвхөн шугам зураад зогсохгүй, тасралтгүй суралцаж, шинэ технологийг ажилдаа ухаалгаар ашиглаж сурах нь зайлшгүй эзэмших ёстой суурь чадвар юм байна гэдгийг ухамсарласан.
4. Энэ замыг туулж ирэхдээ өөртөө суулгасан, таныг хамгийн ихээр төлөвшүүлсэн гол сургамж юу байв?
"Хэзээ ч суралцахаа зогсоож болохгүй" гэдэг зарчим. Инженерийн салбар маш хурдтай хувьсан өөрчлөгдөж байна. Өдөр бүр бага багаар ч хамаагүй өөрийгөө хөгжүүлж, шинэ зүйл сурч байж л урсгал сөрж, илүү чадварлаг, үнэ цэнтэй инженер болж чаддаг гэдгийг ойлгосон доо.
5. Өөрийн хуримтлуулсан туршлагадаа үндэслэн залуу инженерүүддээ хамгийн түрүүнд захиж хэлэх зөвлөгөө юу вэ?
Зөвхөн сургуулийн ширээний ном, онолоор өөрийгөө хязгаарлаж болохгүй. Аль болох бодит төслүүд дээр гар бие оролцож, амьд туршлага хуримтлуулах хэрэгтэй. Мөн үүнтэй зэрэгцээд шинэ технологи, тэр дундаа хиймэл оюун ухааныг (AI) өдөр тутмын ажилдаа хэрхэн үр дүнтэй ашиглахыг суралцаарай. Энэ чадвар нь таныг ирээдүйн хөдөлмөрийн зах зээлд бусдаас ялгарах хамгийн том давуу тал, үнэ цэн чинь болгох болно.
🤗"Инженер хүн хэзээ ч суралцахаа зогсоож болохгүйг үлгэрлэн харуулдаг Б.Баярмагнай инженертээ бидний гэр бүлийн нэгээхэн хэсэг байдагт талархлаа" 😊
