03/08/2026
🙏🙏🙏 ဆုတောင်းပြည့် ရွှေမော်ဓေါ စေတီတော်မြတ်ကြီး၏ သံဘောင်များ ပြုပြင်ထိန်းသိမ်းခြင်း လုပ်ငန်းစဉ် အောင်မြင်စွာ ပြီးစီးခြင်း။
မြတ်စွာဘုရားရှင်၏ ဆံတော်ဓာတ်တော်များ ကိန်းဝပ်စိမ့်ဝင်တော်မူရာ၊ သထုံဘုရင် သမလနှင့် ဝိမလ မင်းညီနောင်တို့ စတင်တည်ထားကိုးကွယ်ခဲ့သည့် နှစ်ပေါင်း ၂,၆၀၀ ကျော် သမိုင်းဝင် ပဲခူးမြို့၏ ကျက်သရေဆောင် "ဆုတောင်းပြည့် ရွှေမော်ဓေါ စေတီတော်မြတ်ကြီး" ၏ နှစ် (၇၀) ကျော် သက်တမ်းရှိ လှိုင်ဂူအတွင်းမှ သံဘောင်များအား ဆေးအဟောင်းများ ချွတ်ခြင်း နှင့် ရာသီဥတုဒဏ်ခံ မရိန်းဆေး (Marine Paint) သုတ်လိမ်း ထိန်းသိမ်းခြင်း လုပ်ငန်းများကို အောင်မြင်စွာ ဆောင်ရွက်ပြီးစီးခဲ့ပြီ ဖြစ်ပါသည်။
ခေတ်အဆက်ဆက် ငလျင်ဒဏ်များကြောင့် ပျက်စီးခဲ့ရသော်လည်း ၁၃၁၅ ခုနှစ်တွင် ခေတ်မီ အင်ဂျင်နီယာ နည်းပညာသုံး သံဘောင်များဖြင့် ခိုင်ခံ့စွာ ပြန်လည်တည်ဆောက်ခဲ့သော စေတီတော်မြတ်ကြီး၏ သမိုင်းဝင် တည်ဆောက်ပုံများ ရေရှည်ခိုင်ခံ့တည်မြဲရေးအတွက် သာသနာပြု ကုသိုလ်တော်အဖြစ် ပါဝင်ခွင့်၊ ပြုပြင်ခွင့် ရရှိခဲ့သည့်အတွက် အတိုင်းမသိ ဝမ်းမြောက်ဂုဏ်ယူမိပါသည်။
ဤလုပ်ငန်းစဉ်ကြီး အစစအရာရာ အဆင်ပြေချောမွေ့စွာ ပြီးစီးအောင်မြင်ရေးအတွက် နီးကပ်စွာ လမ်းညွှန်ပံ့ပိုးပေးကြသော စေတီတော်ဂေါပကအဖွဲ့နှင့် တာဝန်ရှိသူများ၊ လက်တွဲဆောင်ရွက်ခဲ့ကြသော မိတ်ဖက်အဖွဲ့အစည်းများ၊ Sub-Contractor များနှင့် ပင်ပန်းဆင်းရဲခံကာ တာဝန်ကျေပွန်စွာ လုပ်ဆောင်ပေးခဲ့ကြသော အင်ဂျင်နီယာများ၊ ကျွမ်းကျင်လုပ်သား ရဲဘော်များအားလုံးကိုလည်း အထူးပင် ကျေးဇူးတင်ရှိပါသည်။
စေတီတော်မြတ်ကြီး ရေရှည်တည်တံ့ခိုင်မြဲရေးအတွက် ဆောင်ရွက်ခဲ့ကြသည့် ဤကောင်းမှုကုသိုလ်စုတို့၏ အကျိုးဆက်ကြောင့် အားလုံး ကိုယ်၏ကျန်းမာခြင်း၊ စိတ်၏ချမ်းသာခြင်းတို့ဖြင့် ပြည့်စုံကြပါစေကြောင်း ဆုမွန်ကောင်းတောင်းရင်း စေတနာအပြည့်ဖြင့် မျှဝေလိုက်ရပါသည်ခင်ဗျာ...။🙏🙏🙏
