សំរិទ្ធ ធារ៉ូ - Samrith Thearo

06/07/2026

29/06/2026

នឹកសៀមរាប

29/06/2026

ឯកឧត្តមរដ្ឋលេខាធិការ ហាស់ សារ៉េត អញ្ជើញចូលរួមកិច្ចប្រជុំលើការងារ​បង្ក្រាប​បទល្មើសនេសាទខុសច្បាប់ គ្រប់ប្រភេទលើផ្ទៃបឹងទន្លេសាប នៅ​ខេត្តពោធិ៍សាត់
======================

នៅថ្ងៃទី២៩ ខែមិថុនា ឆ្នាំ២០២៦ ឯកឧត្តមរដ្ឋលេខាធិការ ហាស់ សារ៉េត អមដំណើរដោយ ឯកឧត្ដមអនុរដ្ឋលេខាធិការ ប៉ែន ផល្លិកា និង ឯកឧត្ដម ពុំ សុថា អគ្គនាយក នៃអគ្គនាយកដ្ឋានជលផល បានអញ្ជើញចូលរួមកិច្ចប្រជុំលើ​ការងារបង្ក្រាបបទល្មើសនេសាទខុសច្បាប់ គ្រប់ប្រភេទលើផ្ទៃបឹងទន្លេសាប ក្រោមអធិបតីភាព ឯកឧត្ដមនាយឧត្ដមសេនីយ៍ វង្ស ពិសេន អគ្គមេបញ្ជាការ​នៃកងយោធពលខេមរភូមិន្ទ នៅសាលាខេត្តពោធិ៍សាត់។

កិច្ចប្រជុំនេះក៏មានការអញ្ជើញចូលរួមពីសំណាក់ ឯកឧត្តមនាយឧត្តមសេនីយ៍ ម៉ៅ សុផាន់ មេបញ្ជាការកងទ័ពជើងគោក មេបញ្ជាការយោធភូមិភាគទី៤ និងទី៥ ឯកឧត្តមអភិបាលខេត្ត និងអភិបាលរងខេត្តពោធិ៍សាត់ មេបញ្ជាការ​តំបន់​ប្រតិបត្តិការសឹករងខេត្ត មេបញ្ជាការកងរាជអាវុធខេត្ត ស្នងការនគរបាល​ខេត្ត ព្រះរាជអាជ្ញា ប្រធានមន្ទីរកសិកម្មខេត្ត និងខណ្ឌរដ្ឋបាលជលផល​ខេត្ត​ជុំវិញ​បឹងទន្លេសាប។

ក្រោយពីបានស្តាប់របាយការណ៍បូកសរុបលទ្ធផល ស្តីពីវឌ្ឍនភាពការងារ​បង្រ្កាបបទ​ល្មើសនេសាទក៏ដូចជាទិសដៅភារកិច្ចសំខាន់ៗរបស់ គណៈ​កម្មការនៃកងទ័ពជើងគោករួចមក អង្គប្រជុំបានរួមមតិយោបល់ និង វាយ​តម្លៃខ្ពស់ អំពីការដឹកនាំ ការចាត់ចែងបញ្ជា និងការសហការអនុវត្ត​បានល្អ​តាមតួនាទីភារកិច្ច។

មានមតិបូកសរុបនិងផ្តាំផ្ញើ ឯកឧត្តមនាយឧត្ដមសេនីយ៍ វង្ស ពិសេន ប្រធាន​អង្គប្រជុំបានសង្កត់ធ្ងន់លើការងារ៣ចំណុចសំខាន់ៗរួមមាន៖ (១). ទទួល​ស្គាល់​ក្នុងរយៈពេល៣ឆ្នាំចុងក្រោយនេះ ផលត្រីទឹកសាបមាន​ការកើនឡើង ជាបន្តបន្ទាប់ធ្វើឱ្យប្រជាពលដ្ឋទូទៅ ជាពិសេសប្រជានេសាទ​មានការ​សប្បាយ​រីករាយ ក្នុងការដោះស្រាយជីវភាពប្រចាំថ្ងៃ។

(២). តាមរយៈនេះ អង្គប្រជុំត្រូវបន្តការប្រើប្រាស់កម្លាំងសរុប មធ្យោ​បាយសរុប និងវិធានការសរុបលើការងារសំខាន់ពីរគឺ៖ ទី១. បន្តការ​ឃោសនា​អប់រំផ្សព្វ​ផ្សាយ ពិសេសច្បាប់ជលផលថ្មីលើគ្រប់រូបភាព ទី២.អនុវត្ត​​ច្បាប់តាមរយៈយន្ត
​​​ការបង្ការទប់ស្កាត់ និងបង្រ្កាបបទល្មើស​នេសាទខុស​ច្បាប់​គ្រប់​ប្រភេទ និងការ​កាប់រានព្រៃលិចទឹក​ដែលជាជម្រក​ត្រីពងកូន។ (៣). គ្រប់​តួអង្គពាក់ព័ន្ធ​ទាំង​អស់​ត្រូវប្តេជ្ញាចិត្តអនុវត្តឱ្យ​បានល្អស្របតាមគោលការណ៍ គោលនយោបាយ​របស់រាជរដ្ឋាភិបាល៕

28/06/2026

25/06/2026

សង្កាត់រដ្ឋបាលជលផលបារាយណ៍ បានចុះត្រួតពិនិត្យ និងបង្ក្រាបបទល្មើសនេសាទ ភូមិសាស្ត្រស្រុកបារាយណ៍ ខេត្តកំពង់ធំ
= = = = = = = = = = = = =
នៅថ្ងៃទី២៥ ខែមិថុនា ឆ្នាំ២០២៦ លោក ភិន សុភា នាយសង្កាត់រដ្ឋបាលជលផលបារាយណ៍ បានចូលរួមជាមួយក្រុមការងារទីបញ្ជាការស្រាលប្រចាំការនៅស្រុកបារាយណ៍ បានចុះទប់ស្កាត់និងបង្រ្កាបបទល្មើសជលផលដោយប្រើឧបករណ៍ខុសច្បាប់(ឆក់ត្រី) នៅចំណុចត្រព្រាំងគល់ស្ថិតនៅភូមិសាស្ត្រឃុំចុងដូង ស្រុកបារាយណ៍ ខេត្តកំពង់ធំ លទ្ធផលអនុវត្តបាន ១ករណី ៖
-បានបំផ្លាញចោលឧបករណ៍នេសាទខុសច្បាប់នៅនឹងកន្លែងរួមមាន: ដុំភ្លើងឆក់ត្រីចំនួន២គ្រឿង អាគុយ៤០អំព័រចំនួន២ គ្រឿង ដងឆក់ចំនួន២គូ ខ្សែភ្លើងប្រវែង៦ម៉ែត្រ ៕

24/06/2026

ខណ្ឌរដ្ឋបាលជលផលខេត្តពោធិ៍សាត់ រួមជាមួយកងរាជអាវុធហត្ថ​ខេត្ត និងជំនាញពាក់ព័ន្ធសហការចុះបង្ក្រាបបទល្មើសនេសាទ នៅស្រុកក្រគរ ក្នុងខេត្ត​ពោធិ៍សាត់
======================

នៅថ្ងៃទី២៤ ខែមិថុនា ឆ្នាំ២០២៦ លោក ភុន សុវណ្ណា បានដឹកនាំក្រុម​ការងារ​ខណ្ឌរដ្ឋបាលជលផលនៃមន្ទីរកសិកម្ម រុក្ខាប្រមាញ់ និង​នេសាទ​​ខេត្តពោធិ៍សាត់ រួមមាន៖ នាយផ្នែករដ្ឋបាលជលផលក្រគរ នាយ​សង្កាត់រដ្ឋបាលជលផលកំពង់លួង សហការជាមួយកងរាជអាវុធ​ហត្ថ​ខេត្តពោធិ៍សាត់ កម្លាំងកងពលតូចថ្មើរជើងលេខ៥៣ និងកម្លាំង​តំបន់​ប្រតិបត្តិការសឹករងពោធិ៍សាត់ បានចុះត្រួតពិនិត្យ និងទប់ស្កាត់ បង្ក្រាប​​បទល្មើសនេសាទ ចាប់ពីចំណុចជ្រោយស្ដី នៅក្នុងភូមិត្រពាំង​រំដេញ ឃុំក្បាលត្រាច រហូតដល់មុខភូមិកំពង់ថ្គោល ឃុំអន្សារចំបក់ ស្រុកក្រគរ។

ជាលទ្ធផលនៃបេសកកម្មបង្ក្រាបបទល្មើសនេសាទនោះ ក្រុមការងារ​ជំនាញបានរឹបអូសលូស្បៃមុងបានចំនួន០១ករណី៖ រុះរើរបាំងស្បៃ​មុងចំនួន ១៦ខ្សែ ប្រវែង ១.២៥០ម៉ែត្រ លូកងស្បៃមុងចំនួន ១៨មាត់ បង្គោលចំនួន ១៧៥ដើម និងចាក់លែងត្រីចម្រុះចំនួន ១០គីឡូក្រាម៕

23/06/2026

សង្កាត់រដ្ឋបាលជលផលគោកធ្លក និងកោះអណ្តែត រួមជាមួយ​សហ​គមន៍​​នេសាទ និងអាជ្ញាធរស្រុក សហការចុះបង្ក្រាបបទ​ល្មើស​នេសាទ នៅក្នុងខេត្តតាកែវ
======================

នៅថ្ងៃទី២៣ ខែមិថុនា ឆ្នាំ២០២៦ នាយសង្កាត់រដ្ឋបាលជលផលគោក​ធ្លក លោក អ៊ឹម ឧត្តម និងលោក លីម ស៊ុនឆ័យ នាយរងសង្កាត់គោក​ធ្លក រួមជាមួយនឹងកម្លាំងសហគមន៍នេសាទ លោក រស់ រ័ត្ន ឣភិបាល​រង​ស្រុកឣង្គរបូរី និងជាប្រធានគណៈបញ្ជាការឯកភាពស្រុកឣង្គរបូរី បានចុះត្រួតពិនិត្យ និងបង្ក្រាបបទល្មើសនេសាទ នៅស្រុកចំនួនពីរ គឺ​ស្រុក​អង្គរបូរី និងស្រុកកោះអណ្តែត ក្នុងខេត្តតាកែវ។

ក្នុងបេសកកម្មបង្រ្កាបបទល្មើសនេសាទនោះ បានប្រើទូក០២គ្រឿង ដោយ​មានអ្នកចូលរួមចំនួន២១នាក់។ ក្រុមការងារជំនាញបានធ្វើ​ការ​រុះរើ និងបំផ្លាញចោលសម្រាស់ និងសៃយ៉ឺនស្បៃមុងរួមមាន៖ សម្រាស់​ចំនួន៣ដុំ ទំហំ១ ៨០០ ម៉ែត្រការ៉េ(បំផ្លាញចោលនឹងកន្លែង) សៃយ៉ឺន​ស្បៃ​មុង ចំនួន៣មាត់លូ (រក្សាទុកនៅស្នាក់ការអង្គរបូរី) របាំងស្បៃមុង ប្រវែង៣០ម៉ែត្រ(បំផ្លាញចោលនឹងកន្លែង) បង្គោលឬស្សី ចំនួន៩៧ដើម (បំផ្លាញចោលនឹងកន្លែង) នៅចំណុចខាងកើតជាប់សាលាស្រុកអង្គរ​បូរី ឃុំព្រែកផ្ទោល ស្រុកអង្គរបូរី ខេត្តតាកែវ។

ចំណែកឯនាយសង្កាត់រដ្ឋបាលជលផលកោះអណ្តែត សហការជាមួយ​សហ​គមន៍នេសាទ កោះអណ្តែតបានចុះបង្គ្រាបបទល្មើសជលផល និង​ដក​ហូតវត្ថុតាងរួមមាន៖ អាគុយ៤០អំពែចំនួន១គ្រឿងអាំងវែកទ័រ​ចំនួន​១គ្រឿង ដងឆក់ចំនួន១គូ ប៊ីដុងជ័រចំនួន១គ្រឿង ផលត្រី​ចំរុះ​ចំនួន២គីឡូក្រាម នៅទីតាំងនៅចំណុចអាងកញ្រ្ជុង ឃុំរមេញ ស្រុក កោះអណ្តែត៕

22/06/2026

នៅថ្ងៃទី២២ ខែមិថុនា ឆ្នាំ២០២៦ នាយសង្កាត់រដ្ឋបាលជលផលពាមបាង លោក ហួន ផល បានអញ្ជើញដឹកនាំមន្រ្តី និងមន្រ្តីជាប់កិច្ចសន្យា ចូលរួមជាមួយលោកអនុសេនីយ៍ឯក លុយ សុភាព នាយទាហានថ្នាក់ដឹកនាំតំបន់ប្រតិបត្តិការសឹករងកំពង់ធំ ( យោធភូមិភាគទី៤) សហការជាមួយ កម្លាំងទីបញ្ជាការស្រាល ប្រចាំការ ឃុំពាមបាង ស្រុកស្ទោង បានអញ្ជើញចុះត្រួតពិនិត្យ និងបង្រ្កាបបទល្មើសនេសាទនៅចំណុចពាមឈើកែវ ដល់កប់ចិន ជាប់ព្រំប្រទល់ឃុំអន្លុងសំណរស្រុកជីក្រែង ខេត្តសៀមរាប ឃុំពាមបាង ស្រុកស្ទោង ខេត្តកំពង់ធំ។

ដំណើរនេះ ក្រុមការងារជំនាញ បានរុះរើកាប់បំផ្លាញចោលរបាំងស្បៃមុង ខុសច្បាប់នៅនឹងកន្លែងរួមមាន របាំងស្បៃមុងចំនួន១១ របាំងប្រវែង ៦៥០ ម៉ែត្រ ឡុកស្បៃមុងចំនួន ១១គ្រឿង លូឬលបស្បៃមុង ចំនួន២២មាត់ បង្គោលចំនួន ៥៥០ដើម ព្រមទាំងចាក់លែងត្រីចម្រុះចំនួន១០គីឡូក្រាម៕