17/06/2026
【生命第一 行出安全︱「落實執行安全措施及推廣安全文化」研討會】
今日嘅「生命第一 行出安全」研討會吸引超過60位建造業領導層現場出席及3,400位網上參加者，了解更多同安全相關嘅資訊同埋良好實例，攜手提升建造業安全水平。
建造業議會建造安全專責委員會主席王紹恆先生致辭時提到，管理層喺推動工地安全文化方面擔任關鍵嘅角色，呼籲佢哋要多啲親自去到工地向前線工友宣講安全嘅重要。
發展局首席助理秘書長（工務）林達明工程師就表示，要保障工友嘅安全，需要業界各持分者嘅努力去履行安全嘅責任，亦都鼓勵大家多啲喺工地應用「安全智慧工地」系統（4S）。
一眾講者同大家分享安全使用塔式起重機嘅工作守則、工地實踐同埋相關經驗等，例如對塔式起重機進行全面檢查，確認處於安全操作狀態，訂立清晰嘅天秤安裝檢查、檢驗以及例行保養流程表。而喺每一次升秤前，都要喺監督工程師同合資格人士現場監督下進行，完成加高後再由合資格檢驗員進行徹底檢驗與測試。另外亦都可以利用AI系統去監察天秤運作，提升工地安全同效率。
建造業議會主席何安誠教授工程師致閉幕辭時強調，事故係可以避免，促請業界加強工地管理，檢視各個工地目前嘅作業流程同安全風險，切實執行相關嘅安全措施。建造安全，人人有責，希望業界可以加強安全文化，締造更安全嘅工作環境！
更多安全資訊 👉🏻 https://www.cic.hk/zh-hk/safety
#建造業議會 #生命第一 #工地安全 #安全文化
