LOK Building Surveying & Snagging Ltd

08/09/2026

今朝突然間想試吓呢杯嘢，自己調劑下 😂
Espresso + Tonic Water ☕️🫧

估唔到又幾清爽喎～
有冇朋友都鍾意飲呢杯嘢？😆

07/09/2026

「有落喉箍，實穩陣啦！」
真係？開機試一試先講。👀💦

新樓發展商附送洗衣機兼包安裝，去水喉仲加埋喉箍，表面望落的確裝得幾穩陣。

但 Snagging 最忌就係——睇落冇問題，就當佢冇問題。

實際開機一試……

照漏水。💦

其實做新樓 Snagging，好多問題單靠「望」係未必發現到。尤其洗衣機、洗碗碟機呢類涉及來去水嘅設備，接駁位睇落正常，唔代表實際使用時一定冇問題。

所以驗樓時，我哋唔單止睇安裝手工，可以實際測試嘅，都應該盡量測試。

今日可能只係接駁位漏幾滴水，但如果入住後長期滲漏而冇察覺，廚櫃、地板同附近飾面都有機會受到水損。

發展商「包安裝」係一回事，
有冇安裝妥當，又係另一回事。

所以有時 Snagging 搵到嘅問題，未必係一眼就睇得出——
試過，先至知道。🔍

#新樓驗樓 #英國驗樓 #英國買樓 #英國新樓 #漏水 #洗衣機 #測量師 #測量師爸爸

04/09/2026

今日完成咗一個新樓 Snagging 驗樓。

呢個發展商我哋之前都驗過唔少單位，整體手工一向唔算差，用料亦唔錯。不過今日呢個單位就比較多甩漏，尤其係廁所部分，有啲位置甚至似係仲未完全收工。

今次其中一個重點，就係新樓比較常見嘅問題——浴缸龍頭位置漏水。

測試浴缸龍頭及去水期間發現滲漏，而今次情況更加明顯，樓下天花已經直接出現水跡，將漏水問題完全反映出嚟。

呢啲位置表面睇落可以好正常，甚至完全睇唔出有問題，但一開水做實際測試，問題就即刻走晒出嚟。

另外，坐廁後方嘅喉管、接駁位、牆身開口同收口亦比較粗疏，發泡膠、建築碎屑等仍然清楚可見，完成度確實有改善空間。

尤其係漏水問題，唔係抹乾水跡就算。維修完成之後一定要重新做用水測試，確認接駁位置冇再滲漏，同時亦要檢查樓下天花受潮嘅情況。

新樓唔代表零問題。
好多問題唔試，真係唔會知。

盡快執修好晒，就可以安心收樓、安居入伙。

LOK Building Surveying & Snagging Limited
新樓驗樓｜Snagging Inspection

#英國驗樓 #新樓驗樓 #新樓收樓 #浴缸漏水 #漏水測試 #英國買樓 #測量師爸爸

22/08/2026

🇵🇹 葡萄牙早餐打卡｜Pastéis de Belém 😋

去到葡萄牙，點可以唔試吓「元祖級」葡撻——Pastéis de Belém！據講由 1837 年已經開始整，未食之前已經好期待。

一上枱見到熱辣辣、金黃色嘅葡撻，酥皮一層層，外脆內滑，蛋香濃郁……結果一碟幾個擺晒喺面前。😂

#非常推介佢嘅熱朱古力 濃郁香滑

唔好怪我呀，朝早真係好肚餓！🤣
而且真係好食，嚟到里斯本值得專登過嚟試一次！👍

今日早餐：葡撻 ☕️
今日心情：滿足 😆
至於卡路里……返英國先再算啦！🤣

#葡萄牙 #里斯本 #葡撻 #葡萄牙美食 #早餐 #旅行日常 #測量師爸爸

16/08/2026

第一次喺晏菲路坐到咁近！❤️

今日嚟到 Anfield，準備現場睇 Liverpool 🆚 Como！

今次個座位真係有驚喜——就喺球員通道隔離！🔥
第一次喺晏菲路坐到咁近，球場就在眼前，等陣球員出場更加會喺身邊經過！😍

比賽仲未開始，已經感受到現場氣氛！
呢個角度睇波，應該會係一次好難忘嘅體驗！⚽️🙌

Come on Reds！🔴
You’ll Never Walk Alone！

#利物浦 #紅軍 #晏菲路 #球員通道 #第一次坐咁近 #現場睇波 #英國生活 #英國日常 #測量師爸爸

08/08/2026

有啲期待日食

08/08/2026

04/08/2026

#驗樓師爸爸
#新樓驗樓 #英國置業 #驗樓

04/08/2026

今日一口氣完成咗兩個 Bloor Homes 新樓 Snagging Inspection，而且係兩間相連嘅 semi-detached 單位。

一如既往，Bloor Homes 嘅整體造工同質素都保持唔錯水準仲有好多細節位做得好好。今次檢查時，就連浴缸底部🛁呢啲平時業主唔會見到嘅位置，都保持得非常整潔乾淨，反映施工團隊對細節都有一定要求。

當然，再高質素嘅新樓，都難免會有大大小小嘅瑕疵，所以收樓前做一次專業 Snagging Inspection 仍然十分值得。

其中一個單位旁邊有大型樹木🌲🪵，驗樓時發現 Gutter 已有少量樹葉及雜物積聚，因此已建議發展商喺交樓前安排清理一次，避免日後因排水受阻而引致滲漏或溢水。

驗樓唔單止係搵瑕疵，更重要係留意一啲容易被忽略、但可能影響日後居住同保養嘅細節。

#驗樓師爸爸
#新樓驗樓 #英國置業 #驗樓

27/07/2026

🏡 家居保養小貼士｜你屋企個抽氣扇，有幾耐冇清潔？

唔少人都會忽略抽氣扇，覺得仲有風、有聲，就應該冇問題。

但其實拆開之後，扇葉同機身內部好多時已經積聚咗大量灰塵。尤其係浴室抽氣扇，每日吸走水蒸氣，灰塵同濕氣會慢慢黏埋一齊，形成一層污垢，比普通乾塵更難清理。

積聚得愈耐，抽風效果就會愈差，濕氣唔容易排走，增加發霉機會，仲會令摩打長期負荷較大，影響抽氣扇壽命。

📌 建議每年檢查一次抽氣扇，每 1–2 年安排一次徹底清潔。 如果浴室使用頻繁，或者屋企濕氣較重，就可以清潔得密啲。

💡 清潔時，最好搵多個人幫手。 一個負責拆開同清潔，另一個就用吸塵機一路吸走灰塵。咁唔單止可以減少灰塵四圍飛，仲可以清潔得更加乾淨，同時亦減少污垢跌返入天花或浴室。

其實家居保養唔一定要等到有問題先處理，好多小細節，只要及早保養，就可以慳返唔少維修費，屋企亦會住得更加舒服。

你屋企個抽氣扇，上一次清潔係幾時？👇

#家居保養 #抽氣扇清潔 #浴室保養 #防潮防霉 #家居小知識 #物業保養 #測量師爸爸 #英國生活