09/10/2026
🎸 【David Bowie童年故居隔籬！兩房細屋變四房，幾個階段終於批到！】
大家好！唔經唔覺又到星期五啦，今個禮拜嘅個案有少少星味✨
Bromley有條好寧靜嘅住宅街，David Bowie嘅童年故居就喺嗰度。佢由8歲住到20歲，可以話係喺嗰度長大，後來成為世界知名嘅音樂人。Heritage of London Trust而家打算將間屋還原返1960年代嘅樣，目標係2027年尾開放俾公眾參觀。(到時啲街坊真係多得佢唔少呀🤭)
咁隔籬嗰間屋又係咩來頭？就係我哋今次負責規劃嘅項目😎
🏠 細屋大挑戰：有限空間點樣變出更多可能？簡直係係一場《Space Oddity》！
原本係一間兩房細屋，地下嗰層佔地大約38平方米。業主就想喺屋後加建一個6米深嘅擴建，再加樓上後部擴建同閣樓改建；另外，仲想拆走舊車房，喺花園加建一間Home Office+Gym。
如果一開始就將所有工程一齊申請，要考慮嘅因素會多好多，市議會審批起上嚟亦會複雜啲。所以我哋決定分階段處理，一步一步嚟，先打好基礎，再推進下一步。
1️⃣ 第一步：先睇吓可唔可以行許可發展權（Permitted Development Rights-PDR）呢條路
6米後部擴建就走大型住宅後部擴建事前審批程序（Larger Home Extension Prior Approval）。申請交上去之後，市議會最後確認毋須事前審批（Prior Approval Not Required）✅
我哋呢個做法，亦有參考咗我哋喺2018年Bromley一宗成功上訴個案。當時規劃督察（Planning Inspector）睇過相關條文，認為條文冇寫明只可以起一座後部擴建。不過每間屋嘅情況都唔同，仲要逐項睇返設計同其他許可發展條件，唔係話有個成功案例就可以照搬。
同一時間，我哋亦為閣樓改建同花園入面嘅家庭辦公室/健身室申請合法發展證明書（Lawful Development Certificate-LDC）。閣樓加建體積計出嚟大約33立方米，冇超過排屋40立方米嘅上限。最後，合法發展證明書都批咗 ✅
2️⃣ 第二步：拎住已批嘅後備方案，再入正式規劃申請（Full Planning Application）
合法發展證書獲批後，我哋就再入正式規劃申請，將地下兩部分擴建連埋一齊，再喺其中一部分上面加建樓上後部擴建，同閣樓方案一齊處理。
我哋亦向市議會解釋，評估新方案時，除咗睇現時間屋嘅情況，亦可以一併考慮已獲批、而且真係有機會會起嘅方案，即係規劃上講嘅後備方案。如果同呢個方案比較，新設計帶嚟嘅額外影響唔大，呢點就可以成為市議會作決定時嘅其中一個考慮因素。
Court of Appeal一案講明，如果想用一個方案做後備方案，就要證明佢真係有機會落實（real prospect of implementation），先可以喺規劃評估入面作為重要考慮。
另外，我哋2017年亦喺Harrow成功處理過一宗相關上訴。規劃督察認為，申請方案同已獲准、而且有實際機會落實嘅後備方案相比，唔會對鄰居造成額外影響。
3️⃣ 第三步：等到呢一刻，規劃許可終於批咗！🎉
經過幾個階段逐步處理，所需批核終於到手！個方案會將原本兩房嘅細屋改成四房，仲會加埋開放式廚房飯廳、洗衣房、樓下洗手間，同埋花園入面嘅家庭辦公室／健身室。
計返今次大概多咗幾多空間？
屋內擴建加閣樓，估計增加約54平方米（約580平方呎）；連埋花園嘅Home Office+Gym，四捨五入新建樓面就有64平方米(約690平方呎)。
Bowie有首歌叫《Changes》，今次業主間屋都真係大變身喇！😂
🧱 仲有《Under Pressure》呢一關：共用牆程序（Party Wall procedure）都要處理好！
拎到規劃許可，唔等於即刻可以開工。今次工程有啲工序會涉及共用牆（Party Wall），例如閣樓鋼樑要由共用牆承托，所以仲要另外處理《Party Wall etc. Act 1996》下適用嘅程序。
今次仲有一點幾特別：隔籬物業正正由負責保育Bowie故居嘅Heritage of London Trust持有。圖則要畫得清楚，施工安排亦要諗周全，始終都要好好尊重相鄰物業。
記住呀，攞咗規劃許可（Planning Permission），唔代表建築規例（Building Regulations）同共用牆程序（Party Wall procedure）都搞掂晒。呢幾樣係分開處理嘅，唔可以互相代替。
📌 三樣嘢記住：
1. 工程多、內容又複雜，可以考慮分階段申請；不過要先搞清楚每個階段應該行邊種規劃程序。
2. 已批嘅方案可以作為評估新方案時嘅後備方案，但前提係真係有機會落實。
3. 拎到規劃許可唔代表其他程序都完成；共用牆程序（Party Wall procedure）同建築規例（Building Regulations）都要另外處理。
Bowie’s House目標係2027年尾開放。到時，隔籬間故居會重現返1960年代嘅模樣，而業主間屋亦準備揭開新一頁。兩間屋，就喺同一條街上各自展開新故事！🚀
如果你隔籬係搖滾巨星嘅童年故居，你會點諗？留言話我知 👇
如果你都諗緊點樣幫屋企擴建、騰多啲空間，歡迎Inbox我哋傾吓，睇吓有咩方案適合你間屋。
━━━━━━━━━━━
🔗 相關連結：
BBC 新聞：David Bowie 童年故居計劃引起鄰居關注
https://www.bbc.co.uk/news/articles/czjz9mrd7rgo
Bowie’s House 官方網站
https://bowieshouse.org/
GOV.UK：Party Wall and Building Work 指引
https://www.gov.uk/party-walls-building-works
━━━━━━━━━━━
#英國測量師 #英國買樓 #擴建
