10/08/2026
{ وَلَا تَبْخَسُوا النَّاسَ أَشْيَاءَهُمْ } صدق الله العظيم 📜
كلمتين مكسورين في خاطر كل نقاش أمين وشقيان! 👷♂️🎨
بص يا سيدي، العرف السائد في سوق التشطيبات إن النقاش هو آخر حلقة، وده بيخليه "كبش الفداء" اللي يشيل الليلة كلها لوحده! تعالوا نرتبها صح ونشوف الواقع اللي بيحصل جوه الموقع مرحلة بمرحلة:
1️⃣ مشاكل المحارة ووزنات الحوائط:
تبدأ الشغل تلاقي الحوائط محارة معوجة تماماً أو فيها مطبات، وبتضطر تاخد وقت وخامات عشان تسحب معجون زيادة وتوزن الحوائط عشان تبعد عن أي عيب، وفي الآخر يقولك: "ما هو السعر شامل!".
2️⃣ شغل النجار والأبواب:
يجي النجار يركب الأبواب والحلق، وتلاقي الفراغات والشقوق والتكسير حوالين الحلوق، غير ظبط الأبواب وشغل سد المسام والمعجون والبطانة والدوائر.. مين اللي بيدخل يعالج ويسوك عشان الشغل يبان مقفول؟ "النقاش"!
3️⃣ مرمات تكسير كل الصنايعية:
تخلص تأسيس الحوائط، يجي بعدك الكهربائي يكسر للعلب ويمدد خراطيمه.. وفي الآخر مين اللي بيشيل ليلة المرمات دي كلها ويعيد المعجون والصنفرة؟ "النقاش"! ولما تطلب حقها يقولك: "تبع الشغل!".
4️⃣ بيوت النور والجبس بورد:
بتاع الجبس يخلص، وتجيلك "بيوت النور" على الضهارة. النقاش بيقعد يتعب ويطلع عينه جوه التجويفات والزوايا الصعبة دي، وفي الآخر تيجي تحاسب يقولك: "ما هي جوه السعر!".. إزاي وهي شغل دابل بياخد وقت أضعاف الشغل العادي؟!
5️⃣ تركيب ودهان البانوهات:
نوصل للتشطيب الفاخر؛ تلاقي الصنايعي يتفق معاك على متر الدهانات، وبعدين يركب البانوهات (فوم أو خشب أو بولي يوريثان) ويقيس الزوايا ويظبط الوزنيات بدقة مهندس ديكور، وبعدين يؤسس ويدهن.. تيجي تحاسب يقولك: "يا عم ما هي تبع الشغل!".. لا معلش، تركيب البانوهات ده فن وتأسيس ودهان لوحده، مش متر حائط عادي خالص!
6️⃣ نظافة ورا الكل:
الكهربائي والجبس والنجار.. الكل بيمشي ويسيب المكان مقلوب مخلفات وزبالة، ومين اللي بينضف ويلم وراه عشان يقفلي الشغل نظيف ويسلم على الفرازة؟ "النقاش برضه"!
💡 الخلاصة والزتونة:
الحوار زاد عن حدّه ومبقاش ينفع سكتة ولا "شد ظلم"! النقاش بينزل خامات بالفلوس، وبيقعد أيام وبيصرف يوميات عمالة ومصاريف نقل ووقت طويل في حاجات أساساً مش جوه متر الدهانات العادي.
معالجة المحارة، شغل النجار، مرمات تكسير الصنايعية، بيوت النور، تركيب ودهان البانوهات، والنظافة المستمرة.. دي كلها بنود منفصلة تماماً ومجهود إضافي بيتعب الأعصاب وبيخسر الصنايعي.
ما يصحش أبداً إن النقاش يتحاسب على تعب غيره ولا يشيل ليلة الموقع كله لوحده. (أعطوا الأجير حقَّه قبل أن يَجِفَّ عَرَقُه)، وكل صنايعي له حقه وتعبُه مصان! 🤝
#البانوهات ُقاس
