31/01/2019
ليه العميل يشتري المنتج بتاعك😉
ليه العميل ممكن يشتري المنتج بتاعك ؟
لو فكرت في إجابة السؤال يبقى أنت محتاج تقرأ اللي جاي ، وتعمل حاجة اسمها:-
Unique Selling Proposition (USP)
ملخص كتابي في صورة عرض تحفيزي لأسباب إتمام الديل، واللي بيساعدك تستفيد من نقاط القوة، وتركز ، وتطور من نفسك بين المنافسين.
طب إزاي هأعمله ؟
شوية خطوات هنمشيها لازم ترتبهم في دماغك وأنت بتعمله.. وحاول تنفذها بعد ما تقرأ المقال ده
1- لمين ؟
العميل هو الشخص اللي بتبيع له المنتج ،واللي لازم تهتم توصله الرسالة صح..ففي حالة بتعرض عليه بشكل كتابي في صورة "عرض"..محتاج تحدد قايمة بأهداف العرض ده وبيستهدف مين.. ولو عندك اسم العميل اللي رايح له يستحسن تحطه ،لأنه لو قرأ اسمه في البداية هيديك اهتمام أكتر ويكمل.
2-بيحل ايه ؟
المفترض المنتج أو الخدمة اللي بتبيعها تحل مشكلة العميل ،والطبيعي أنها مش هتحل كل حاجة،فأنك تعدد أسباب الشراء ،هو أنك تحدد ايه المشاكل اللي بيحلها المنتج.
3- مختلف في ايه ؟
وده بتحدد فيه ايه نقاط اختلافك وتميزك عن أشهر منافسينك كشركة، واللي لو العميل فكر في حل المشكلة هيجوا في باله ،فبتبدأ تبرز أنت متفوق عليهم في ايه ،بحيث لو العميل عمل مقارنة في دماغه ،يتأكد أن الديل الناجح معاك أنت ،وينتهي انبهاره بالطرف الاخر
4- المنتج
بعد ما جذبت العميل أنه الهدف بتاعك ، وأنت تقدر تحل مشاكله ،وكمان تقدر تتفوق على منافسينك
بيجي دور أنك تقوله اسم المنتج المحدد وتركز عليه ،أن ده الحل الحقيقي والدوا اللي هيعالج مشكلته ويلبي احتياجه، وبشكل بسيط في العرض من غير مدح زيادة.
5- المردود
وده العائد المتوقع على العميل ،واللي بيوفر له حل للمشكلة ،بالإضافة أنك تبرز خصائص تعلي من قيمة المنتج ، زي مثلاً أنه بيحل المشكلة ، و كمان سهل الاستخدام ، و فوق كل ده سعره أقل.
ودي خطوة ممتدة لاسم المنتج ، ممكن تفكر أن لازم تبدأ بيها ،بس فرضًا أنك قلت فوايد لحلول مشاكل مش عنده ،ساعتها هيفكر أنه مش محتاج المنتج.
مثال :
" للسيدات ،اللي حابة تبان ستايلش ، على عكس الstores التقليدية ،ستور" ستايلش" بيقدم كولكيشن عصري أنيق وبخصم عالي ،ليكي أنتي"
كل ما ترتب كلامك،هتحوز على اهتمام العميل في فترة أقل ،وهيهتم يكمل معاك.
استنونا في مقالات أكتر.. وخليك أشطر حد.
