عيادة د.باسم خليل - جراحات العظام و المفاصل

14/10/2025

14/10/2025

هو الكسر ده محتاج عملية يا دكتور ؟ وإمتى الكسور الصعبة تحتاج جراحة وإمتى ممكن تتعمل علاج تحفظى ؟
السؤال ده من أكتر الأسئلة اللى بتتسأل فى جراحة العظام
وهو فعلا سؤال مهم و بيحتاج قرار مدروس بعناية عشان يتحقق أفضل نتيجة لصاحب الكسر اللى بيكون فى أكتر فترات حياته خوف وقلق على صحته.وطبعا إجابة سؤال زى ده مش سهل زى ماحد ممكن يتخيل وفيه إختلاف أراء ومدارس. لكن بالرغم من كده التوصيات العالمية والدراسات الدولية اللى اتعملت لكل نوع من الكسور بتمهد الطريق لخطة العلاج المناسبة وطبعا عامل خبرة الطبيب الجراح هى اللى فى الأخر بتحكم كل ده فى خطة علاج مناسبة تحقق الهدف المطلوب و بأعلى نسبة نجاح ممكنة.
وبدون الدخول فى تفاصيل علمية وفنية ممكن تتوه القارئ العزيز هنحاول نديكم مثال بسيط يوضح الصورة.
الحالة الموجودة تحت دى كان لشخص رجل عنده 32 سنة اتعرض لحادث سيارة أدت لإصابات متعددة فى الرأس والصدر والبطن و الأطراف كان اخطرها نزيف فى المخ ونزيف فى الصدر ومعاها كمان كسر عظمة العضد (أعلى الدراع) دى. وطبعا الشخص ده كان بيتعالج من فريق كامل من عدة تخصصات لكن بالنسبة لجراحة العظام الكسر وحالة المريض العامة رجحت العلاج التحفظى بجبيرة دون جراحة وكان وضع الكسر مناسب للعلاج التحفظى زى ماهو واضح فى صور الأشعة التانية والتالتة داخل الجبس. والمريض تابع العلاج فى أحد المستشفيات لمدة أكتر من 6 أسابيع متواصلة وتحسنت حالته ودرجه وعيه وعلاماته الحيوية وأصبح يتحرك لوحده... لكن ...
للأسف حصلت حاجة غيرت كل التحسن الكبير ده ؟
تم أهمال كسر العضد والمريض فك الجبس من نفسه وما تابعش مع أى جراح عظام عشان بعدها يحصل شلل فى العصب الكعبرى للدراع والساعد نتيجة ضغط على العصب فى منطقة الكسر.
ولما المريض جالنا وفحصناه لقينا أن الكسر كان بدأ يحصل فيه إلتئام لكن العصب كان ضعيف ومضغوط عليه مع سقوط فى مفصل الرسغ وعدم وجود أى حركة باسطة للأصابع . وده طبعا يحتاج عملية جراحة تسليك للعصب مع رد للكسر وتثبيته بشريحة ومسامير ذاتية الغلق.
والغريب لما الجراحة اتعملت إننا لقينا العصب محاط بكمية كبيرة من العضم المتكلس وده ملاحظة متكررة بنشوفها كتيرفى المرضى اللى بيحصلهم إصابات فى الرأس فبنلاقى دايما فيه سرعة فى تكون كمية كبيرة من التكلسات والعظام الجديد فى منطقة الكسر.
وبفضل الله وتوفيقه تم تحرير العصب المضغوط من كل التكلسات والعضم الكتير ده وتثبيت الكسر بشريحة بمواصفات خاصة.
وبعد العملية العصب رجع يشتغل تانى وقوة الحركة فى عضلات الساعد واليد رجعت لحالتها الطبيعية.
ودى من الحالات اللى تعتبر أكبر مثل بتتحول فيها خطة العلاج من العلاج التحفظى بدون جراحة إلى العلاج الجراحى المفتوح والتثبيت بشريحة ومسامير.

26/02/2024

عند إصابة أحد أطفالنا لاقدر الله نصبح في حالة نفسية صعبة جدا خاصة عندما يكون الكسر من النوع القوى والظاهر جدا فيه مدي تشوه شكل العضو المصاب بدرجة لا تخطئها العين كالكسر الموجود على سبيل المثال في الصورة الموضحة أسفله.

وفى مثل هذه الحالات يكون تفكير معظم غير المتخصصين وأحيانا بعض المتخصصين فى طرق العلاج الجراحى ... ولكن.

من فضل الله سبحانه وتعالي ومن كرمه علينا أنه أعطي عظام الأطفال خصائص فريده تجعل من العلاج الغير جراحى في اليد المتخصصة نتائج أفضل من التدخلات الجراحية وذلك لأن عظام الأطفال أكثر ليونة وأسرع فى الشفاء من عظام البالغين مع القدرة على تعديل درجات محددة من الإنحراف مع نمو الطفل إلي مرحلة البلوغ.

ولو تم رد مثل هذه الحالات من الكسور الصعبة إلي الوضع الطبيعي مع عمل جبس بطريقة جيدة تثبت الكسر ومع الصبر والتعاون الوثيق بين الطبيب وأهل الطفل تلتئم العظام بشكل ممتاز ويعطي العلاج التحفظى نتائج قد تكون أفضل من العلاج الجراحى والتثبيت بأسياخ أو أسلاك معدنية.

ومن يعمل في هذا النوع من الحالات يري بعينه قدرة الله عز وجل في خلقه وكيف أنه لا يضيع مجهود أي طبيب يبذل كل مافي وسعه ويصبر ويحاول بشتي الطرق الإجتهاد الشديد والوصول إلي اقرب شكل ووظيفة لما كان عليه الأطفال فلذات أكبادنا قبل تعرضهم لقضاء الله وقدره.

01/11/2022

تعد جراحات تثبيت الكسور المفصلية المتفتتة الناتجة عن حوادث السيارات القوية أو حالات السقوط علي القدم من ارتفاعات شاهقة هي أكثر عمليات المفاصل صعوبة لأنها تحتاج دقة شديدة في التعامل بعناية وحرص بالغ مع قطع الكسور المتعددة مع الحفاظ علي حيوية هذه القطع وأعادة تكوين السطح المفصلي المتفتت لأقرب صورة شبيهة بالسطح الطبيعي لكي لا يعاني المريض في المستقبل من حدوث خشونة بالمفاصل تستدعي تدخلات جراحية جديدة.

من يعمل في هذا النوع من الجراحات يري قدرة الله عز وجل في خلقه وكيف أنه ما من مخلوق قادر أبدا أن يقترب من أعادة صنع الله إلي سابق شكله وكل من نقدر عليه هو الإجتهاد الشديد لمحاولة الوصول إلي اقرب شكل ووظيفة لما كان عليه الإنسان قبل تعرضه لقضاء الله وقدره.

10/06/2022

أول دواء فى التاريخ يشفى من مرض السرطان بنسبة 100% : _________________________________

ايوووووووه زى ما انت قريت كدة بالضبط إكتشفوا علاج للسرطان نسبة الشفاء فيه وصلت 100%.

يعني ده العلاج اللي كلنا كأطباء كان حلم بالنسبة لنا وادينا في سنة 2022 وبعد أزمة الكورونا اللي عشناها بنشوف الحلم بيتحقق.

فهل فهلا فيه حاجة كده ولا ده مجرد إشاعة وتريند من تريندات السوشيال ميديا ؟

تعالي شوف معايا كده التفاصيل اللي ححاول علي قد ماقدر أبسط الجزء العلمي التقيل اللي فيها.

مبدأيا كده الدواء المعجزة ده إسمه العلمي هو Dostarlimab و إسمه التجارى Jemperli وطبعا مش محتاج اقول إن الدوا ده بيتاخد تحت إشراف طبي كامل وداخل مستشفيات مجهزة ومتخصصة في علاج الأورام.

وعشان نبسط الأمور الدواء ده من عيلة ادوية بتتسمي في الطب Mab او ال Monoclonal Antibody يعني من الأجسام المضادة وطالما هو جسم مضاد يبقى هايشتغل على جهاز المناعة وبكدة نقدر نقول انه نوع متقدم من انواع العلاج المناعي Immunotherapy .

الجسم المضاد ده او ال Antibody محتاج جسم تاني او Antigen يشبك معاه عشان يشتغل ويحقب وظيفته. وعشان كده الدواء المعجزة ده بيشبك ويرتبط مع مستقبل خاص علي الخلية اسمه PD-1 Receptor وهنا PD اختصار للموت المبرمج او ال Programmed Death والمستقبل ده موجود على سطح خلايا مناعية معينة إسمها T cells وهي اللي حتكون مسئولة عن قتل الخلايا السرطانية. وعشان نفهم آلية عمل الدواء ده بدون تعقيد . يبقى لازم نفهم المستقبل اللى اسمه PD-1 Receptor ده وظيفته ايه ؟؟؟

المستقبل ده بيرتبط مع روابط معينة او Ligands وعددهم 2 . واساميهم سهلة جدا :) واحد اسمه PD-L1 والثانى اسمه PD-L2 . لما الروابط دي ال Ligands سواء 1 او 2 يرتبطوا مع PD-1 Receptor هايمنعوا تكاثر الخلايا المناعية او Proliferation of T cells وهايمنعوا إنتاج السيتوكين Cytokine Production from T cells وبالتالى هايعملوا خمول للجهاز المناعي Inhibition of the immune System وبكدة خلايا الورم تتكاثر اكثر لان مفيش جهاز مناعة هايقدر يهاجمها.

الدواء بتاعنا بقي بيمنع العملية دي يعني بيرتبط بالمستقبل ده وبالتالى بيمنع ارتباط الروابط ال Ligands بيه وبالتالي هيعكس العملية كلها وعشان كدة هاتتمكن الخلايا المناعية T cells من التكاثر وزيادة العدد وانتاج السيتوكين Cytokines وبالتالي تبقي قادرة علي مهاجمة الورم وتمنع تكاثره وانتشاره .

الدواء ده اخد موافقة علي التجارب السريرية السنة اللي فاتت 2021 لعلاج سرطان الرحم المرتجع او ال Recurrent وعامل نتائج زى الفل . وبعدين شافوا ان نطاق عمله ممكن يوسع ويخرج برة الرحم ويشتغل على انواع آخرى من الاورام وخاصة الأورام الخبيثة من نوع Solid Tumors.

قالك تعالى نجربه على سرطان القولون . راحوا جابوا 12 مريض سرطان قولون مرحلة ثانية وثالثة . بعضهم عمل جراحة وبعضهم خضع للكيماوى وللاشعاعى بدون فايدة وما زال الورم متمكن منهم وبدأ ينتشر الى العقد الليمفاوية ولكنه لسه مانتشرش الى اعضاء تانية جوة الجسم وجربوا عليهم ال Dostarlimab لمدة 6 شهور .

بعدها مفيش أثر للورم جوة القولون . ييجوا يسحبوا عينة . برضه مفيش ورم . طب يعملوا منظار . برضه مفيش ورم . طب تعالى نعمل رنين ونعمل PET Scan برضه مفيش ورم !!!!!!!!!!!!!
الناس دى بيتم متابعتها واقل مدة متابعة هى 6 شهور بعد العلاج واكثر مدة متابعة هى سنتين وبرضه مفيش ورم ومفيش ورم مرتجع Recurrence وتم اعلان شفاء ال 12 مريض بالكااااااااااااااااامل .

طبعا ده سبق طبى محدش مستوعبه لحد دلوفتي . ويعتبر أول مرة فى تاريخ الطب تحصل المعجزة دى . ومش محتاجين نقول إنه مازال تحت التجربة لكن نتايجه الأولية مبشرة جدا جدا وبشكل غير متوقع.

الدواء ده بيتاخد وريد فقط . حقنة واحدة 500 مجم كل 3 اسابيع لحد 4 جرعات اما الجرعة الخامسة فما فوق هاتبقى 1000 مجم كل 6 اسابيع . ومفيش اى تعديل للجرعات فى مرضى الكبد ومرضى الكلى .

ممنوع منعا باتا مع الحوامل . واى ست فى سن الانجاب لازم تستخدم وسيلة منع حمل قوية اثناء فترة العلاج ولمدة 4 شهور بعد التوقف عن العلاج اما الستات اللى بترضع فلازم ترضع صناعى وتمنع من اى رضاعة لمدة 4 شهور بعد توقف العلاج .

الاثار الجانبية اللى تم رصدها بسيطة . دوخة - غثيان - قىء - طفح جلدى - هرش ولكن بعض المضاعفات القوية نادرة للغاية ولازم توقف العلاج ساعتها فورا ومن اشهرها Sepsis , SJS وكمان حدوث عدوى وخاصة Respiratory Infection or Urinary Infections

واضح ان 2022 هايكون بشرى حلوة وبيحمل فال جميل لمرضى السرطانات الخبيثة . ربنا يشفيهم جميعا ويشفى جميع مرضانا.

شير في الخير ....

28/01/2022

فائدة السجود للعمود الفقري
جمعة مباركة علينا جميعا

22/03/2021

مع دخول شهر الربيع وبعدما صالات الجيم فتحت أبوابها من تاني بعد فترة طويلة من حظر الكورونا واللي أتسببت في زيادة اوزان معظمنا ومع بداية رجوعنا وبكل قوة لصالات الجيم عشان ننزل وزننا و نعمل فورمة الصيف أبتدينا نشوف معدلات عالية من الأصابات اللي حنشرحها في البوست ده.

ولأن مخاطر الجيم وصالات الألعاب مش بس في قصة نقل عدوي فيروس الكورونا الملعون والأحتياطات اللي تخص الوقاية منه كان لازم نتكلم عن الإصابات الرياضية الناتجة عن المبالغة في التدريب أو العادات الغلط اللي ممكن تكون أشد خطورة عليك من الفيروس العالمي ده نفسه ..

تعرف إيه عن (إصابات فرط الإجهاد) ؟؟

في البوست ده وكعادتنا دايما في عرض المحتوى بطريقة السؤال والجواب حنجاوب على السؤال اللي فوق وكذا سؤال تاني يهموك وحنحاول نحط بروتوكول سهل وبسيط يحميك ويحفظك من شر الإصابات اللي زي دي.

فياريت تشيروا البوست ده على أوسع نطاق عشان تعم المنفعة وممكن تكون أنت بنفسك السبب في حماية شخص تعرفه أو حتى ماتعرفوش من مشكلة كبيرة ممكن تأثر على مسار حياته كلها.

١- السؤال الأول :
أزاي أحمي نفسي من مخاطر التدريب ؟

الأصابات الناتجة عن المبالغة في التدريبات ممكن تحصل في ثانية وبسهولة لايمكن حد يتخيلها في حالة ممارسة التمارين الرياضية بأسلوب غلط زي ماهو واضح في الفيديو الموجود بالبوست واللي بالرغم من أهميته الشديدة في شرح الموضوع 🚨🚨🚨 إلا أنه لا ينصح بمشاهدته للأشخاص ذوي القلوب الضعيفة 🚨🚨🚨

#تحذير 🚨🚨🚨
الفيديو غير مناسب للقلوب الضعيفة

وعشان نحمي نفسنا من الخطر ده لازم نتعلم أزاي مانضغطش على عضلاتنا واوتارنا وأربطتنا ونوصلها لنقطة الأنهيار وده سهل جدا حتى مع المبتدئين عن طريق أتباع نظام تدريب تدريجي صحيح تحت أشراف أحد المتخصصين.

٢- السؤال التاني :

هل سبق فكرت أنك تبتدي برنامج بدني جديد أو تكثيف روتين التدريب الحالي ؟

لو كانت أجابتك على السؤال ده هو (ايوه) فلازم ننبه عليك أن ده لازم يكون تحت أشراف متخصص. وحتى لو ماكنتش مبتدئ وعندك الخبرة الكافية ومستوى القوة العضلية العالي اللي ممكن تكون متخيل أنك وصلتله لازم برضو يتحطلك البرنامج المناسب عن طريق المتخصصين. لأن التدرج في الحمل التدريبي علم لوحده وكمية الأخطاء والكوارث اللي بترتكب في المجال ده كبيرة جدا ومن أهمها إستخدام أصناف من المكملات و الأدوية والهرمونات اللي بتأثر على قوة العضلة وبتضعف الأربطة على حساب الحجم وسرعة التضخيم والتنشيف. بمعنى انك لازم تطبقه تحت يد حد متخصص فعلا في المجال ده. ومش اي حد يتقاله يا كوتش تسمع كلامه وتمشي وراه. لأن الحالات الصعبة اللي بنشوفها نتيجة أخطاء التدريب تخليك تفكر ألف مرة قبل ماتوصل نفسك للوضع الصعب اللي في الفيديو.

٣- السؤال التالت :
أيه هي أشهر الأصابات الناتجة عن النوعية دي من التدريب ؟

مصطلح (إصابات الأفراط) ضخم جدا وبيضم مجموعة كبيرة من الأصابات الرياضية المتدرجة في القوة والخطورة. معظمها شائع وبيكون درجة خطورته قليلة زي آلالام العضلات والمفاصل والألتهابات والتمزقات الخفيفة للأربطة وكل المجموعة دي علاجها سهل عن طريق الراحة والعلاج وبرامج الأستشفاء الصحيحة والنزول بالحمل التدريبى. لكن على الطرف التاني فيه مجموعة من الأصابات الخطيرة اللي ممكن تحتاج تدخلات جراحية بعضها بيكون عاجل زي مزق الأوتار من الدرجات التالتة وتمزقات أو تهتكات لغضاريف المفاصل أو مزق كامل للأربطة الهامة بمفاصل الجسم المختلفة.

٤- السؤال الرابع :
إيه هي الأسباب المشهورة لإصابات الإفراط؟

إصابة الإفراط هي نوع من إصابات العضلات أو الأوتار والأربطة أو المفاصل اللي بتنتج عن ممارسات خاطئة. مش بس موضوع المنشطات والأدوية اللي أتكلمنا عنه. ولكن كمان فيه مجموعة من الممارسات التانية زي أخطاء التدريب اللي ممكن تحصل بكل سهولة لو مارست كمية كبيرة من التمارين وبسرعات عالية تفوق قدرة تكوينك العضلي. بمعنى أن تمرينة صاحبك أو حتى اخوك مش لازم بالضرورة تكون مناسبة ليك وممكن تسبب (أصابات الأفراط). السبب التاني الأهم هو أخطاء التكنيك لأن أداء تمرينة زي العضلات الخلفية للفخد أو تمرين الرفرفة للصدر مثلا بأوزان وسرعة مظبوطة لكن بالطريقة الغلط ممكن يعرض صاحبه لأصابات خطيرة في الكتف أو الركبة.

٥- السؤال الخامس :
ماهي عوامل الخطورة المرتبطة بالإفراط في التدريب ؟

رغم أن أي شخص ممكن يتعرض للإصابة الناتجة عن الإفراط في التدريب لكن معدل الخطورة أعلى في الأشخاص أصحاب الفئات العمرية الكبيرة أو الصغيرة عن اللازم خاصة لو ماكنتش قادر تفهم تأثير السن في قوة وقدرة العضلات والأربطة والعظام بشكل عام. معدلات الخطورة برضو بتزيد في الأشخاص اللي عندهم مشاكل طبية معينة زي مرضى الضغط و السكر و القلب أو الأمراض الوراثية أو المزمنة ومتلازمات ضعف العظام والعضلات والخلل الهرموني. وعشان كده يستحسن أنك تتناقش مع طبيبك قبل بداية ممارسة أي نشاط جديد أو زيادة مستوى روتينك الحالي. لأن طبيبك ممكن يقدملك نصايح مهمة من واقع حالتك الصحية العامة تساعدك في ممارسة تدريباتك بطريقة اكتر أمان. فلو كنت مثلا مصاب بضعف في عضلات الضهر أو مفاصل الفخد والركبة طبيبك حيقدر يفيدك بشرح مجموعة تمارين تتعامل مع المشكلة دي وتبعد عنك الأجهاد والآلام المصاحبة.

٦- السؤال السادس :
هل فيه بروتوكول معين يساعدني في تجنب النوعية دي من الأصابات ؟

تجنب الإصابة الناتجة عن الإفراط في التمرين سهل جدا عن طريق مراعاة الأتي :

إستخدام الأسلوب والأدوات المناسبة سواء كنت مبتدئ حتبدأ نشاط جديد أو محترف بيمارس التمرينات لفترات طويلة وبشكل منتظم. فكر دايما في تلقي التدريبات التعليمية الصحيحة من الشخص الصح. فأستخدام الأسلوب الصحيح زي ماقلنا هو حجر الأساس في الموضوع ده كله وله الأهمية البالغة في الوقاية من الإصابات الناتجة عن فرط التدريب.

تأكد دايما من أنك لابس الزي و الحذاء الرياضى المناسب. و أحرص دايما على قاعدة الرياضيين المحترفين في تغييره كل 250 إلى 500 ميل. بمعنى تتعامل معاه بالظبط زي مابتغير الزيت وفلاتر عربيتك كل شوية. وأظن أن عضلاتنا و مفاصلنا أهم أكيد من العفشة أو الموتور 😊. أو على أقل تقدير ممكن تغير حذائك الرياضي مرتين في السنة الواحدة. وده طبعا لو كنت من النوع اللي بيمارس الرياضة بإنتظام.

ماتستعجلش .. لو كان فيه كلمة واحدة ممكن تطلع بيها كنصيحة من كلامنا ده كله حتكون .. ماتستعجلش .. في حالة بداية برنامج جديد للياقة البدنية حافظ على نفسك فأنت عمرك ما حتبقى البطل وتوصل للفورمة اللي بتحلم بيها في خلال أسبوع. لأنك مثلا لو ضغطت النشاط البدني بتاع الأسبوع كله عشان تعمله في يومين فده أهم سبب ممكن يؤدي إلى الإصابات الناتجة عن فرط التدريب.

ولكن الأفضل لك هو ممارسة النشاط البدني المعتدل لمدة ٣٠ دقيقة على الأقل يوميا. ولو كنت ماعندكش الوقت اللي يسمحلك بال ٣٠ دقيقة متواصل دول يوميا. فمن الممكن أن تقسم النشاط إلى عدد فترات اكتر في العدد لكن أقل في المدة على مدار اليوم الواحد. كمان ينصح بأخد الوقت الكافي لعملية التسخين والإحماء قبل ممارسة النشاط البدني اللي تعتبر أهم من أداء التمرين نفسه.

حاول ترفع مستوى نشاطك البدني بشكل تدريجي. ولو اضطريت لتغيير شدة النشاط البدني أو مدته. خليه يكون ببطء وعلى فترات زمنية أطول. وعشان يكون الكلام سهل وواضح حنعرض عليك المثال المهم ده : لو كنت عايز تزود مقدار الوزن اللي بتتدرب بيه أثناء تمرينة القوة والتضخيم فلازم عليك أنه لا يتعدى نسبة ١٠ ٪ كل أسبوع لحد ماتوصل للوزن اللي أنت محتاجه.

حاول تنوع .. بمعنى انك تخلط روتينك التدريبي بتمارين من أنواع مختلفة بدل من التركيز على نوع واحد منها. فممارسة مجموعة متنوعة من التمارين قليلة التأثير زي المشي وركوب الدراجات و السباحة وتمارين السويدى حيساعدك في الوقاية من إصابات فرط التدريب عن طريق السماح لجسمك للإستفادة بمجموعات مختلفة من العضلات وعدم التحميل الزايد على مجموعة واحدة. وتأكد من أن تمارين القوة لمجموعات العضلات الأساسية في الذراعين والساقين وباقي العضلات الأساسية تكون مرتين أسبوعيا على الأقل.

٧- السؤال السابع :

طب أعمل أيه لو قدر الله وحصلت الأصابة ؟

ربنا يحفظنا بأذن الله جميعا من شر الأصابات لكن لو كنت بتشك في إصابتك نتيجة لفرط الإجهاد والتدريب فلازم تستشير طبيبك فورا قبل ما تكمل نفس حملك التدريبي اللي ممكن يعرضك لخطر تفاقم الإصابة. وهو في الغالب حيطلب منك أنك تاخد راحة مؤقتة من التدريبات لكن حتكون في نفس الوقت قادر على ممارسة تمرين بديل يساعد على سرعة الإستشفاء طالما أنه لا يضغط على عضو الجسم اللي إتعرض للإصابة.

إحرص على أنك تبلغ طبيبك بجميع المعلومات اللازمة لو كنت قمت بتغييرات أخيرة في حملك التدريبي أو أسلوبك في التمرين من حيث أنواعه أو كثافته أو مدته أو تكرارته. وأياك أنك تخفي أي معلومة خوفا من أنه ينصحك بالراحة. لأن ده حيساعده في تشخيص حالتك و تحديد سبب إصابتك الناتجة عن فرط الجهد وبالتالي حينجح في تحديد و تصحيح المشكلة وتجنب تكرارها.

ولما تحس أنك شفيت تماما من الإصابة الناتجة عن فرط التدريب أطلب من طبيبك أنه يتحقق من إستعادتك لكامل قوتك العضلية والمدي الحركي للمفاصل ومرونة العضلات والأربطة و قدرات وميكانيكية التوازن قبل ماترجع بالسلامة لنشاطك مرة تانية. ولما ترجع لنشاطك البدنى من تاني ركز كل أهتمامك على إتباع الأسلوب الملائم في أداء التمارين لتجنب أي إصابات مستقبلية.

أهتم بسلامتك وماتخليش الأثر النفسى للإصابة الناتجة عن الإفراط في التدريب تمنعك من أن تكون شخص رياضى و نشيط بدنيا. فعن طريق التعاون مع الطبيب والمتخصصين في الطب الرياضى والمدربين الحاصلين على الشهادات والتراخيص اللازمة والحفاظ على نفسك ممكن تتجنب النوعية الصعبة دي من الإصابات الخطرة وتمارس نشاطك البدني بكل سلامة وآمان.

Be Wise Be Safe

ولاتنسوا الإعجاب والمشاركة و تفعيل متابعة الصفحة ليصلكم كل جديد

04/04/2020

خبر حلو جدا 🤩 .....

فى دراسة مشتركة أتعملت فى أستراليا مابين معهد اكتشاف الطب الحيوي [BDI] فى جامعة موناش (ملبورن) مع معهد [بيتر دوهرتى] للعدوى والمناعة - النتائج المعملية للدراسة دى أثبتت أن فيه دواء ليه القدرة أنه يقلل حجم الحمض النووي الريبوزي لفيروس كورونا المستجد [كوفيد-19] بحوالى 5000 مرة خلال 48 ساعة. الأبحاث اللى تمت على الدواء ده كلها كانت معملية " cell culture " وعلى عينات لخلايا وأنسجة بتحتوى على الفيروس.

الجميل فى الموضوع إن الدواء ده مش جديد ومتوفر من زمان فى الأسواق المصرية وليه كذا إسم تجارى كلهم تحت إسم المادة الفعالة. -مش حقولها عشان ماحدش ينزل يشتريه 😂- وهو دواء مضاد للطفيليات قديم ومعتمد من هيئة الغذاء والدواء الأمريكية FDA من سنة 2012 وبيستخدم فى علاج طفيليات متعلقة بالجهاز الهضمى و أمراض مختلفة زى داء الفيل او بعض العدوي الجلدية.

أهم حاجة فى الموضوع كله عشان الناس -كعادة اى مصرى وسطى جميل- ماتجريش على الصيدليات وتشترى الدواء إنه لسه مادخلش مرحلة التجارب على البشر ومش معروف حتى الآن تفاعلاته واثاره الجانبية على المرضى. ولسه قدامهم كام شهر لحد مايتم الدراسة الكاملة عليه ويتحدد الفعالية و الجرعات المطلوبة وياخد الإعتمادات الدولية على برتوكول إستخدامه كعلاج للفيروس..

ولحد ما الأبحاث والدراسات دى تخلص مش قدامنا غير الألتزام بتعليمات مكافحة العدوى والتباعد المجتمعى لأن الوقاية أفضل مليون مرة من العلاج ...

وربنا يسترها علينا جميعا ويحفظنا ويحفظ جميع أهالينا ....

وماتنسوش تسجلوا إعجابكم بالصفحة عشان يوصلكم كل جديد ...

د.باسم سعيد خليل

إستشارى جراحات العظام والمفاصل والعمود الفقرى

09/04/2018

أشهر شكوي بتيجي عيادات العظام والروماتيزم هي الوجع المنتشر في الجسم كله من غير سبب واضح ولو الشخص كانت إجابته (ايوه) علي الأسئلة دي :
- فيه وجع منتشر في العظام والمفاصل ؟
- فيه "نشر" فى الجسم كله بالذات الصبح اول ماتقوم من النوم ؟
- عندك وجع مش محدد أسفل الضهر ؟
- عندك تيبس متكرر في المفاصل ؟
- فيه تساقط غير مبرر للشعر او جفاف للبشرة ؟
- فيه أرق وصعوبة في النوم توصل لحد نوبات إكتئاب ؟
- فيه مشاكل في القولون ؟
- أعراض نقص المناعة ؟

ولو كنت لفيت على دكاترة العظام والروماتيزم اللي في الدنيا ومفيش أى تحسن واضح او تتحسن وتنتكس تاني...

غالبا ده نقص في "فيتامين د" مرض العصر

الناس دول لو خدوا الدواء ده لمدة ٦ شهور هتختفي الأعراض دي تماماً بإذن الله .

ولو كنتى ست مصرية إتأكدي ان عندك نقص فى "فيتامين د" لان نقص الفيتامين بين الستات في مصر بيوصل لنسبة ٧٢ ٪

لو فكرتى بأه إنك تحملى وبالرغم من كل انواع الڤيتامينات والأدوية اللى حتاخديها بدون الفيتامين العجيب النقص حيوصل معاكى لنسبة ٥٤ ٪ من المعدل الطبيعي ودي نسبة كبيرة بالمعايير الأجنبية.

اما لو بترَضعى فالنقص بيعلى لأعلى مستوياته وبتوصل لنسبة ٧٣ ٪ ودى في حد ذاتها كارثة.

بعد سن اليأس ومع تكرار الحمل والرضاعة ونفاذ مخزون الفيتامين في الجسم ٨١ ٪ من المصريات اللى عندهم هشاشة عظام عندهم نقص شديد من الفيتامين.

ڤيتامين "د" مش بس مش واخد حقه ... لأ ... ده مُهمَل جدا في توصيات الدكاترة وكتير منهم بيتريقوا عليه وبيعتبروه خرافة مش حقيقية

ويوم ما يتكتب - على استحياء - بيتكتب بجرعات هايفة وداخل مجموعة فيتامينات لا تسمن ولا تغني من جوع !!!

انتى عارفه انك لو اخدتى كل يوم وانتى مش حامل ولا بترضعى ٦٠٠٠ وحدة "ڤيتامين د" هيقلل من أمراض العظام والمفاصل ومن الإصابة بالضغط والسكر و مضاد للإكتئاب ومضاد للسرطان وبيزود للمناعة ..

وكل دى أبحاث مؤكدة في أرقى جامعات العالم ..!

طيب عارفة ان حضرتك لو حامل وخدتى ٦٠٠٠ وحدة "ڤيتامين د" يومياً ده بيقلل من ولادة طفل خديچ (قبل الاوان) ومن ظهور ضغط وسكر الحمل والولادة القيصرية ( دراسات جامعة جنوب كارولينا)

مش بس كده دول لقيوا فى أبحاث موثقة ان الأمهات اللى اخدوا جرعات عالية من "فيتامين د" في الحمل زودت وزن الطفل ١٠٠ جرام وطوله ٠.٣ سم عن الأمهات اللى ماخدوش !!!

بلاش دى ... عارفه طبعاً ان الطفل المولود لغاية سن سنتين محتاج ڤيتامين د بجرعات مناسبة ( ٤٠٠ - ١٠٠٠ ) وحدة يومياً
طب ايه رأيك بأه انك لو أخدتى ٦٠٠٠ وحده يوميا وانتى بترضعي هيطلع ٨٠٠ وحده لطفلك في لبن الأم ومش هتحتاجى تديله هو نفسه أى "ڤيتامين د" !!!!

ده غير الفايده ليكي ولعضمك ومناعتك وسعادتك ماتنسيش انه مضاد للإكتئاب 😊

طيب عارفه ان "ڤيتامين د" آمن ليكى تماماً وان الجرعة القصوى للاستعمال اليومى ١٠،٠٠٠ وحدة دوليه ، وعشان يترسب عالكلى ويعمل حصوات لازم تاخدى ٤٠،٠٠٠ وحدة يومياً لمدة شهرين عالأقل وده شبه مستحيل ...!!

طيب عارفة ان آخر أبحاث بتقول ان في علاقة وثيقة بين تساقط الشعر وصحة البشرة ونقص "ڤيتامين د" !!!

وكمان في احصائيات تانيه بتقول ان الفيتامين العجيب ده بيحسن الحرق و بالتالي حيخسسك 😲

واحصائيات كمان بتقول ان ليه دور مهم جدا في تحسين المناعه و منع بعض السرطانات و كمان منع بعض الامراض القلبية

نصيحة منى والله لكل الستات .. البنات .. الآنسات .. الحوامل .. والمرضعات ٦٠٠٠ وحده "فيتامين د" يومياً وهتشوفى الفرق وتدعيلي 😃

"فيتامين د" تحليله وعلاجه بقي متوفر في مصر ولأن الناس ماكنتش تسمع عنه قبل كده فالموضوع بالنسبة لهم لحد دلوقتي غريب

و سوق الدوا مليان أشكال والوان من الفيتامين ...

فيه قطارة بتاخدي منها مرتين في اليوم وفيه اقراص بتاخدي قرص ٥ الاف وحدة كل يوم و في اقراص ٥٠ الف وحدة بتتاخد قرص كل اسبوع و في كمان إبرة ٢٠٠ الف وحدة بتتاخد في العضل كل ٣ اسابيع

الجرعات ديه هي الجرعات العلاجيه للي عندهم شكوي

طيب بعد الست شهور العلاج نعمل ايه؟
وازاي نمنع نقص الفيتامين يرجع تاني في الجسم ؟

الحل إننا نبدأ بعدها ناخد الجرعة الوقائية....

الجرعة الوقائية هي ١٠٠٠-٢٠٠٠ وحدة يوميا يعني قرص ١٠٠٠ كل يوم أو قطارة كاملة كل يومين أو قرص ٥ الاف وحدة كل اسبوع أو قرص ال ٥٠ الف كل شهر

وكل الجرعات دي لازم يتاخد تحت إشراف طبي كامل ووارد اختلاف الجرعات حسب حالة كل شخص

عيشوا بصحة تنعموا بالسعادة 😉

#لاتنسي تسجيل #إعجابك بالصفحة ليصلك كل #جديد

د. باسم سعيد خليل
إستشاري العظام و المفاصل والعمود الفقري

تليفون : 0226772391
موبايل: 01155190033

05/04/2018

١٠ أخطاء لازم تتجنبها في صالات الجيم : _________________________________

هل فكرت قبل كده أنك تنزل للجيم وتمارس الرياضة ؟
ممارسة التمارين الرياضية في صالات الجيم مهمة جدا للحفاظ علي جسم رياضي ووزن مناسب بيساعد علي الصحة العامة للشخص اللي حيقوم بيها. بس قبل ما تعمل ده لازم تعرف أهم الأخطاء اللي ممكن يقع فيها بعض الناس خاصة المبتدئين خلال تواجدهم في صالات الجيم.

فى المقال ده حنتعرف على اهم ما يمكن أنه يواجهك من مشاكل خلال ممارسة التمارين ونظم الرياضة بطريقة صحيحة تمنع عنك لاقدر الله شر الإصابات او حتي الشعور بالإجهاد وعدم الإستفادة من التمرين. واهم الأخطاء دي هي :

١ - عمليه الإحماء :
الإحماء أهم عامل فى حصولك على أفضل التمارين ولو ماعملتهوش بشكل سليم حتتعرض لمشاكل كتير لأن الإحماء الغلط بيزود من شدة الآلم بعد ماتخلص التمارين ولازم تكون بتعرف تحدد طريقه الإحماء الخاصه لكل مجموعة عضلات حتقوم بالتمارين وممكن تستشير طبيبك او المتخصص عن الطرق دي .

٢- تجاهل الآلم :
وزي ما قولنا أن الإحماء بيساعد على تقليل فرص الإصابه فده مش معناه إنك تتجاهل الإصابه اللى ممكن تتعرض لها خلال التمرين (فلا يوجد مكسب بدون آلم No pain No gain) وده شى واقعى جداً لكن ده مش معناه أنك تطنش الالم الزايد عن الطبيعي. فلو حسيت بأي ألم زايد عن الحد لازم تتوقف و تطلب النصيحه الطبيه إذا استمر الآلم.

٣- خد الموضوع بسهولة :
إنت سيبت وقت راحتك واخترت تقضيه في تحدي نفسك وتخطي حدود مجهودك العضلي لهدف الحفاظ علي جسم رياضي. خد الامور ببساطة لأنك عندك كامل الوقت للتغيير ومافيش داعي للإستعجال. وفي نفس الوقت لو ماعندك هدف من وجودك في الجيم ومش فارق معاك الجسم الرياضي وما عندك إرادة التغيير فالإستمتاع لوقت راحتك في نشاط تاني افضل لك من قضاء الوقت دون فايدة حقيقية.

٤- تقضى كل وقتك على نظام الكارديو :
كتير من الناس بتروح لصالات الجيم عشان إنقاص وزنهم وفى النهاية بيلاقي نفسه قضي كل وقته على أجهزة الجرى والعجلات . لكن بالتركيز بس على عمل الكارديو وبمرور الوقت وبزيادة كمية الطاقه حتحتاج مجهود أكبر عشان تقدر تحرق نفس الكميه من الدهون . الأهتمام بالكارديو حاجة أساسية بس مايكونش علي حساب نظام اللياقه البدنيه المتوازن.

٥- إهمال الأساسيات الخاصه بك :
لو كن هدفك الرئيسي أنك تبني عضلاتك وتكبرها عليك بعدم إهمال الأساسيات الخاصه بك وتقوية العضلات الأساسية عشان تملك أعلى فايدة من أى ممارسه لك وده مفتاح اللياقه البدنية المتوازنة لو أن الأساسيات ضعيفة فالجسم كله حيعانى.

٦- إرتداء الملابس الغلط :
ماتتخيلش أن الجينز مثلا حيخليك أكتر راحة لانه حيحد من حركتك ولما تختار اللبس الصح تختار اللبس العملي. ماحد ش بيقولك ألبس شورت ولكن لازم يكون الزي مريح ويحميك ويساعدك في تمريناتك العضلية.

٧- النظر للعضلات فى المرايه :
لو كنت بتشتغل بجد عل تحقيق أعلى النتايج . لكن ده مش حيبرر لك الوقوف قدام المرايه إعجابك بنفسك لأنه حيعكس صورة ممكن تخليك تنبسط على نفسك بدون مبرر وده بينشط هرمونات ومحفزات خاصة تخلي فعلاً نشاط في إستعراض القوة عن طريق تجمع الدم فى الأطراف و إحتقان العضلات والأربطة.

٨- الرغي الكتير مع الناس :
معظم الناس مابيحبوش الكلام فى صالة الجيم . لكن لو كنت حتضيع وقتك فى الكلام ومحاولة تكوين صداقات جديدة فالمكان الأمثل ليك خارج صالة الجيم في نوادي والمراكز الإجتماعية خلي هدفك واضح قدامك فى تحقيق الجسم الرياضي واللياقه البدنيه العالية .

٩- خلق الفوضى :
النقطة دي تقع تحت بند الذوق العام وأداب المجاملة الإجتماعية والحفاظ علي صحة الآخرين. مافيش عذر ليك في تلطيخ الأجهزة بعرقك وكأنك واحد من مفترسين غابات السافانا بترسم مناطق نفوذك وبرضو ما ينفعش تسيب الأوزان الثقيلة في كل مكان وتعرض ناس تانية للإصابات. لازم تنضف مكانك بعد ما تخلص وتحط الأوزان في مكانها زي ما لقتها.

١٠-الإرتجال :
الإستخدام الصحيح للمعدات والأجهزة الرياضية شئ أساسي ولو كنت ماعرفش تستخدمها بالطريقة الصحيحة حتعرض نفسك وتعرض غيرك لخطر الإصابات ولو مش عارف استشير اللي بيعرف وما تتكبرش في آخد النصيحة من حد وثق أنك حتلاقي دايما الدعم والتعاطف من المختصين .

ودايما ما تنساش إنك لو لقدر الله تعرضت لأي أصابة فى الصالة دون قصد منك فعليك استشارة طبيبك المعالج المتخصص في إصابات المفاصل والطب الرياضي.

#لاتنسي تسجيل #إعجابك بالصفحة ليصلك كل #جديد

د. باسم سعيد خليل
إستشاري العظام و المفاصل والعمود الفقري

موبايل: 01155190033