«Քաղաքապետերի դաշնագիր» նախաձեռնության շրջանակում ԵՄ և Երևանի քաղաքապետարանի համաֆինանսավորմամբ իրականացվում է «ԵՄ-ն Երևանի համար. Արևային համայնք» ծրագիրը: Նախատեսվում է ծրագրում ներառված Երևանի 100 բազմաբնակարան շենքերում տեղադրել արևային ֆոտովոլտային (ՖՎ) համակարգեր, որոնց կողմից արտադրված էլեկտրաէներգիայով սնուցվելու են ընդհանուր օգտագործման (շքամուտքեր, հարկային և միջհարկային հարթակներ, աստիճանավանդակներ) տարածքների լուսավորման համակարգերն ու վերելակները:
Նախատեսվում է ծրագրի միջոցների հաշվին ծրագրում ներառված շենքերում բնակվող սոցիալապես անապահով ընտանիքներին տրամադրել լուսադիոդային լամպեր՝ սեփական օգտագործման համար, ըստ ԵՄ կողմից հաստատված ընտրման ցուցանիշների:
Ծրագրի շրջանակներում նախատեսվում է Ծրագրում ներառված յուրաքանչյուր շենքի համար ստեղծել «շրջանառու ֆոնդ», որի նպատակն է՝ Ծրագրի շրջանակներում տեղադրված արևային ֆոտովոլտային կայանների արտադրած էլեկտրաէներգիան էլեկտրաէներգետիկական համակարգին վաճառելուց գոյացած գումարների կուտակումն ու դրանց հետագա պատշաճ տնօրինումը:
Ֆոնդերում կուտակված գումարները նախատեսվում է ծախսվեն նպատակային՝ ստորև նշված ուղղություններում.
- Արևային ՖՎ, ներքին և արտաքին լուսավորման համակարգերի ընթացիկ և հիմնական սպասարկում և նորոգում
- Սպառած էլեկտրաէներգիայի դիմաց ամսական վճարումներ
- Շենքերում հավելյալ էներգախնայողության միջոցառումների իրականացում, օրինակ՝ դռների և պատուհանների փոփոխում, արտաքին պատերի և տանիքների ջերմամեկուսացում
- Արևային ֆոտովոլտային համակարգի շահագործման 25-րդ տարվանից հետո համակարգի կորուստների նվազեցման համար ֆոտովոլտային կայանի վերազինում:
