14/11/2016
Të gjithë individët që kanë në pronësi pasuri të paluajtshme dhe i kanë të regjistruara, brenda datës 28 shkurt 2017, u jepet e drejta të bëjnë rivlerësimin e tyre me vlerën e tregut. Në këto pasuri përfshihet toka dhe ndërtesa, dhe e drejta e rivlerësimit u jepet edhe atyre që e kanë bërë më herët një gjë të tillë. Tarifa për këtë procedurë do të jetë 700 lekë dhe pronarët duhet të paraqiten në zyrat vendore të Regjistrimit të Pasurive të Paluajtshme ku kanë regjistruar pronën duke plotësuar formularin që do u jepet atje, “Kërkesë për rivlerësim”. Udhëzimi u jep të drejtë qytetarëve të zgjedhin vullnetarisht, nëse rivlerësimin do ta bëjë Hipoteka apo një ekspert i licencuar. Në rast se do të zgjedhin këtë të fundit, formularit duhet t’i bashkëngjisin fotokopjen e licencës së vlerësuesit dhe aktin origjinal të vlerësimit të pronës.
PROCEDURA
Udhëzimi përcakton se individi, i cili paraqitet në ZRPP, pajiset me dy kopje të formularit dhe plotëson dy pikat e para të tij. Punonjësi i ZRPP-së, plotëson pikën 3 të formularit, me vlerën e pasurisë sipas aktit të regjistrimit ose vlerës së rivlerësuar, për të cilën është paguar tatimi. “Në rastet kur pasuria e paluajtshme rezulton e regjistruar pa asnjë kontratë sh*tjeje , atëherë për të përcaktuar vlerën e regjistrimit të pasurisë në ZRPP, konsiderohet vlera e çmimeve minimale fiskale në çastin e regjistrimit të fitimit të pronësisë. Punonjësi llogarit tatimin që paguhet për regjistrimin e këtij rivlerësimi, i cili është në masën 2 % të bazës së tatueshme, duke plotësuar pikën 4 të formularit “Kërkesë për rivlerësim”, thuhet në udhëzim. Ndërkohë, pas këtij plotësimi, individi aplikon për rivlerësim të pasurisë së paluajtshme dhe pajiset me dokumentin e nevojshëm për pagesën e tatimit. “Në këtë rast individi paguan në bankë tatimin 2 % dhe tarifën e shërbimit, të cilat i bashkëlidhen formularit”. Pas kryerjes së pagesës së tatimit dhe tarifës së shërbimit, ZVRPP-ja bën ndryshimet përkatëse në regjistrin e pasurive të paluajtshme. Në rast se individi zotëron më shumë se një pasuri të patundshme, rivlerësimi do të jetë individual për secilën.
PER BIZNESET
Edhe personat juridikë, të cilët kanë të regjistruar në pasqyrat e tyre financiare pasuri të paluajtshme me vlerë më të vogël se ajo e tregut, kanë të drejtë të bëjnë, deri në datën 28 shkurt 2017, rivlerësimin me vlerën e tregut të këtyre pasurive. Edhe për ta, rivlerësimi me vlerën e tregut bëhet nga ekspertë të pavarur e të licencuar. “Personat juridikë, për këtë rivlerësim, paguajnë 3 për qind të diferencës ndërmjet vlerës së rivlerësimit dhe vlerës kontabël të regjistruar, për pasuritë e paluajtshme. Personi juridik mban një kartelë të pasurisë së paluajtshme, ku evidenton vlerën përkatëse të pasurisë së paluajtshme që nga momenti i njohjes fillestare të aktivit dhe tatimin përkatës, të paguar sipas legjislacionit në fuqi”, citon udhëzimi. Dokumentet për këtë kategori nisin nga rivlerësimi vullnetar për pasurinë e paluajtshme e vijojnë më pas me kopje të licencës dhe kopje të faturës së shërbimit të ekspertit të vlerësimit të pasurisë, akti origjinal i vlerësimit të pronës, pasqyra financiare e vitit 2015 dhe kopja e mandatit të pagesës për vlerësimin e pasurisë në masën 3 % të diferencës ndërmjet vlerës së rivlerësimit dhe vlerës kontabël për pasuritë e paluajtshme të regjistruara në pasqyrat financiare.
Neritan Gjergo Të gjithë individët që kanë në pronësi pasuri të paluajtshme dhe i kanë të regjistruara, brenda datës 28 shkurt 2017, u j
