08/03/2025
✨ 💼 სოფო თურმანიძე კომპანია ,,დაქთლაბის“ დამფუძნებელი და დირექტორია.
რას ნიშნავს მუშაობდე მსგავს სფეროში და უძღვებოდე საწარმოს, რომელიც ქართულ ბაზარზე ღირსეულად იმკვიდრებს ადგილს? რა სირთულეებთან არის დაკავშირებული მსგავს სპეციფიურ დარგში მოღვაწეობა და რას ურჩევს მათ, ვისაც წარმატების მიღწევა სურთ? - სოფო სარვამარტო პოსტში მის გამოცდილებას გვიზიარებს.
- სოფო რა დატვირთვა აქვს შენთვის აღნიშნულ სფეროს? სპეციფიური მიმართულებაა და ალბათ ქალისთვის არ არის მარტივი ამ კუთხით საქმიანობა?
- ჩემი ძირითადი პროფესია ბიზნესის მენეჯმენტია. ერთი მხრივ, პროფესიულად სწორ გზაზე ვარ, თუმცა არასდროს მიფიქრია მე და ვენტილაციის სისტემები ასე თუ დავმეგობრდებოდით. ადრე რომ ეკითხათ ჩემთვის რა არის სამკაპი ან მოქნილი გადაბმა ჰაერსატარების კომპლექტებიდან, უცნაურად მომეჩვენებოდა... ახლა კი იმდენად ვერკვევი ყველა დეტალში, მათ შორის პროდუქციის დამზადების პროცესებში, თვითონაც მიკვირს. მომწონს ჩემი თავი ამ სფეროში, საკუთარ თავზეც მოვირგე და შემიყვარდა კიდეც. სირთულეები ახლავს, თუმცა ეს საქმე საამაყოა.
- საქართველოში ამ დარგში როგორი კონკურენციაა და რა ადგილი უჭირავს საწარმოს დღეს?
- დღეს ამ დარგში კონკურენცია არც თუ ისე დიდია. ,,დაქთლაბი“ არის საწარმო, რომელმაც უკვე ითანამშრომლა არაერთ კომპანიასთან და შეიტანა წვლილი სხვადასხვა საინტერესო პროექტის განხორციელებაში. ძალიან საინტერესო იყო ჩვენთვის, როგორც პატარა დამწყები კომპანიისთვის მსგავსი გამოცდილება. გვაქვს შესაბამისი ტექნიკური აღჭურვილობა, ვიყენებთ ევროპული სტანდარტების ტექნოლოგიებს და გვყავს გამოცდილი თანამშრომლები, რომელთა გადამზადებაც ადგილზე მოვახდინეთ.
- რას ნიშნავს იყო მსგავსი კომპანიის ნაწილი? რა მოგცა აქ მუშაობამ?
- ჩემთვის პრივილეგიაა ვაკეთო ის საქმე, რაც მაინტერესებს. კომპანიის ზრდასთან ერთად, მეც ვვითარდები და ვაანალიზებ, რომ ყველაფერი წინ არის.
- რა არის შენთვის საამაყო და მნიშვნელოვანი?
- საამაყოა ის ფაქტი, რომ ჩვენთან არსებული თანამედროვე დანადგარები შესაძლებლობას გვაძლევს, უმოკლეს დროში ვაწარმოოთ ხარისხიანი პროდუქცია და პარალელურად, ვიფიქროთ საწარმოო არეალის გაფართოებაზე.
- რას ურჩევდი საქმიან ქალბატონებს? რა პრინციპის დაცვაა საჭირო, რაც დაეხმარებათ წარმატების მიღწევაში და ასევე გუნდის ეფექტიან მართვაში?
- ვურჩევდი იყვნენ თავდაჯერებულები, მოტივირებულები და საქმეზე ორიენტირებულები, რაც მიმაჩნია განვითარების ერთ-ერთ უმთავრეს გზად.
#დაქთლაბი #ინტერვიუ #8მარტი
