06/09/2026
其實每次同買家驗完樓都會做次網上會議，主打就係希望透過會議令每位買家及家人明白間屋的情況，間中都會瞭解到置業的原因，而最近係有啲令我擔心的情況出現，今次希望大家可以更瞭解一下。
可能近年經濟比較差，加上租務條款的收緊，令普遍的租務市場風險提高左，再加上好多「投資達人」教授將物業轉做短租或者Airbnb，每個月同每日的租金都高好多，又有彈性易搵租客，所以吸引到唔少買家準備入手。
我要提醒的係，除咗英國政府，其實leasehold物業條文及按揭條文都對短租及Airbnb有管制，有買家聲稱自住按揭打算私下放Airbnb，有業主唔知需要管理處同意，更有買家以為全年都可以做Airbnb日日收錢。
作為測量師，我再分享一次有關Airbnb的經歷，一步一驚心。事緣有次驗樓，突然收到代理通知要延期兩個月，原來係業主做緊Airbnb，突然接到兩個月的租客所以要延期，但因為買家都有考慮所以一個月後我就要去驗樓了，所以我當日會遇到租客。
當日我一上到Loft就已經嚇親，一個大麻種植場就喺我眼前😱，所有設施都同我睇新聞的一模一樣，（之後亦有英國警方朋友睇過，99%大麻場），最大鑊的係，當我驗房間時探濕儀不停咁響，當我想睇下床邊牆身時發現大量發霉😱，呢個時候租客聽到咁嘈就問我間屋係咪有問題，因為佢哋住咁耐就病咁耐，好在捱多個月就可以搬番屋企。呢一刻，我終於要將收埋好耐的官方答案拎出黎「我今日係為買家工作，所有資料都不便透露」。
之後同買家傾番先知，原來佢有同代理傾過，瞭解過呢間屋係長期Airbnb加短租，仲要有價有市，所以非常吸引。但之後佢同律師詳細傾過相關的風險後，再加上現場的情況，最後都寧願放棄，如果係你，你又會點做呢？
#英國物業
