15/10/2026
ለሠራተኞች የተጠና የደመወዝ ጭማሪ ሊደረግ ነው!
መንግሥት ለሠራተኞች የተጠና የደመወዝ ጭማሪ እንደሚያደርግ ኢሰማኮ ገለጸ!
የኢትዮጵያ መንግሥት ከጥር 2019 ዓ.ም. ጀምሮ ለሲቪል ሰርቫንት ሠራተኞች የደመወዝ ጭማሪ ለማድረግ ዝግጅት እያደረገ መሆኑን መረጃዎች ይጠቁማሉ። ይህ የደመወዝ ማስተካከያ ዕውን የሚሆነው በአሁኑ ወቅት በመላው አገሪቱ እየተካሄደ ያለው የመንግሥት ሠራተኞች የዲጂታል ምዝገባና ቆጠራ ሥራ ሙሉ በሙሉ ተጠናቆ የመጨረሻው መረጃ ሲደራጅ እንደሆነ ታውቋል።
ሂደቱ ግልጽነት ያለው አሠራር ለመዘርጋትና የመንግሥትን የሰው ኃይል በውጤታማነት ለማስተዳደር የታለመ በመሆኑ፣ የቆጠራው መጠናቀቅ ለጭማሪው ትግበራ መሠረታዊ ቅድመ-ሁኔታ ተደርጎ ተወስዷል።
ምንም እንኳን የደመወዝ ጭማሪው እንደሚደረግ ቢገለጽም፣ ጭማሪው በትክክል በምን ያህል መጠን ወይም በመቶኛ እንደሆነ እስካሁን በይፋ የታወቀ የተወሰነ የገንዘብ መጠን የለም። የመንግሥት የፋይናንስ አቅም፣ የአገሪቱ አጠቃላይ የኢኮኖሚ ሁኔታና የዋጋ ንረት እየተጠና ያለው ጭማሪ መጠን ላይ ውሳኔ ለመስጠት ከግምት ውስጥ የሚገቡ ዋና ዋና ነጥቦች ናቸው።
የመንግሥት ሠራተኞች የሰው ኃይል ቆጠራው ሙሉ በሙሉ ተጠናቆ የመጨረሻው መረጃ ሲያልቅ፣ የሚጨመረው የደመወዝ መጠንና የአፈጻጸም መመሪያው በይፋ ለተለያዩ መገናኛ ብዙኃንና ለሕዝብ እንደሚገለጽ ይጠበቃል።
ምንጭ፦ ኢሰማኮ
