02/09/2019
"بسم الله الرحمن الرحيم "
البوست دة مهم جدا لأي حد بيفكر يعمل جيبس بورد في شقته 🙂
خلينا نبدأ كلامنا ف بند الجيبس بورد ,,,
الجيبس بورد دة عباره عن الواح مكونه من خليط من الجبس والسيليكون والفيبر جلاس ومغطاه من الجهتين بطبقه رقيقه من الكرتون المقوي والمعالج
عباره عن 3 أنواع :
النوع الاول : الجيبس بورد العادي الابيض ,,, ودة بنستخدمه في الاماكن الداخلية عدا الحمامات والمطابخ
النوع الثاني : الجيبس بورد الاخضر .... ودة بنستخدمه في الحمامات والمطابخ لأنه مقاوم الرطوبة
النوع التالت : الجيبس بورد الاحمر ,,,, ودة بنستخدمه في الاماكن المعرضة للحريق ,,, لأن مقاومته للحريق بتكون أعلي 🙂
الجيبس بورد بنستخدمه في عمل الاسقف المعلقه وعمل الحوائط والقواطيع والتشكيلات المعماريه في الاسقف او الحوائط وفي حالة اننا محتاجين نعمل سبوتات او بيت نور او بيت ستاره ,,,, او محتاجين نعمل مكتبه .. او نعدي حاجه من فوق عند السقف ومحتجين نغطيها ... او محتاجين نعمل تكييف كونسيلد ونعمل جريلة ليه ... فبنعمله بوكس من الجيبس بورد
"" حضرتك هتتفق مع صنايعي جيبس بورد ييجي يعمل معاينه للمكان وتقوله انتا محتاج تعمل ايه ؟
محتاج تغطي حاجه معينه ؟؟
محتاج تفتح سبوتات ؟؟
محتاج شكل معين ؟؟
مكتبه ؟؟
وبيبدأ يديك سعر للمتر المربع والمتر الطولي توريد وتركيب ؟؟
المتر المربع: سعر أي سطح عرضه أكبر من 1م
المتر الطولي : سعر أي سطح عرضه أقل من 1 م
يعني لو عند سقف 3*4 م ,,, فبيتحسب متر مربع
لو عندك سقف 4 م * 0.5 سم ,,بيتحسب متر طولي
بس دلوقتي الصنايعيه مبقاش ليها طريقة قياس محدده ... وطريقة القياس عمتا لازم تفاوضه فيها لأن فيه صنايعيه هيحاول يديك سعر بحيث يقدر يجمع أمتار أكتر 😉
يعني ممكن تلاقي صنايعي بيقولك انا هديك اي شكل متر مسطح ...
الصنايعي يفضل ياخد الموضوع منك توريد وتركيب لأن الخامه هتكون بتاعته وقتها فمش هيقطع منها عمال على بطال ,,
التنفيذ :
هييجي الصنايعيه ومعاه الخامات عباره عن :
الواح الجبس ( وديه الالواح اللي بيقطع منها )
الزوي ( وديه زوايا بنستخدمها في التثبيت )
الاوميجات ( قطاعات صاج بنستخدمها ف التثبيت وغالبا هيا اللى بتشيل الجبس )
السيهات ( قطاع صاج بنستخدمه ف التثبيت )
مسامير التيك ( وديه المسامير اللى بيثبت بيها )
فيشر
تيش ( ودة بنستخدمه في التثبيت لو سقوط الجيبس بورد كبير
تيب ( ودة بيتحط بين الفواصل عشان الفاصل لو ريح بعد كدة ميظهرش فيه شرخ )
شكاير معجون ( ودة بيسحب بيه اماكن المسامير والفواصل بعد لما بيخلص )
ميتال
-لو هعمل حيطه هيكون عندي طبقتين من الجبس بورد والسمك بتاع الحيطه هيكون هوا عرض ال c الي احنا مركبنها جوه الحيطه
فكرة التثبيت الصح غالي .. وعشان كدة لو حد قالك سعر قليل ف تركيب الجبس .. متفرحش لانه هيوفر ف الصاج وهتلاقي الجبس بتاعك بالوقت بيريح 🙂
وبعد لما بيخلص ... بيبدأ يركب تيب في الفواصل ,,, والميتال في الزوايا عشان يظبطها ويمعجن الجبس ويداري أي مسامير 🙂
طب ايه الغرض من ان الناس تعمل جبس بورد ✊👌
-عشان يعمل شكل ديكور في السقف
-عشان نمشي اسلاك او كابلات فوقه (في المحلان والمولات)
-عشان يخفي عيوب في السقف لو في حاجه بايظه
-عشان نعمل بيه بيت للستاره
طب ازاي تستلم الجبس بورد !! ✋
-الراسيه
-الفرق بين اللحامات ما يكونشي باين
-مطابقه التصميم للواقع
-استلام افقيه الشكل
-لو عندي حاجه مستقيمه اشد عليها خيط واتاكد من الاستقامه
-لو عندي دوران اتاكد انه معمول صح
ملحوظة مهم جدا :
الكهربائي هوا اللى يفتح السبوتات مش بتاع الجبس 🙂 وتفتحها قبل المعجون مش بعده عشان الكهربائي لازم يشوف مكان المسامير .
سعر تركيب الجيبس بورد من 120 جنيه للمتر لحد 200 جنيه للمتر ,,, تخيل ؟؟ والسعر دة يشمل التوريد و التركيب وكل المراحل اللى اتكلمنا عنها فوق
بيفرق من مكان لمكان ودور لدور والاشكال اللى هتتعمل وطريقة التثبيت ... فانتا لو شخص مش دايس في الموضوع دة كتير ..... هيكون صعب عليك التأكد من السعر ف الاول بس بالوقت هتاخد الخبره 😉 ,,,
