17/09/2026
مهما عملت أرضي بشكل ممتاز، الاستشاري مش هيوقعلك على المحضر غير بتقرير قراءات جهاز (Earth Resistance Tester). 🧐☝
القياس له قواعد هندسية عشان تاخد قراءة حقيقية مش وهمية. 👌⚡
فتعالوا نفهم أحد طرق القياس وقواعدها خطوة بخطوة، وفي البوستات الجاية هنفهم باقي الطرق والحسابات. 🤓👇
1. أول خطوة وهي فصل بارة الاختبار (Disconnect Test Link)
أكبر غلطة بيقع فيها مهندس الموقع هي توصيل أطراف الجهاز وبارة الاختبار متوصلة.
الصح قبل ما تختبر، لازم تفتح بارة الاختبار (Test Link) الموجودة جوه غرفة التفتيش تماماً، وتفصل كابل الأرضي الخاص بالمبنى عن شبكة الأرضي.
طب ليه؟
لأنك لو قست وأرضي المبنى مربوط مع أبيار الأرضي على ال Test link، إنت هنا مش بتقيس مقاومة أبيار الأرضي لوحدها، إنت بتقيس شبكة أرضي المبنى كله متوصلة على التوازي مع أبيار الأرضي، وهيطلعلك رقم صغير جداً وهمي مثلاً 0.2 أوم بينما الشبكة نفسها مثلاً ممكن تكون 15 أوم أو أكتر.
============================
2. طريقة القياس ثلاثية الأطراف (3-Pole Fall of Potential)
جهاز الـ Earth Tester بيكون فيه 3 أطراف أساسية (E , P , C):
- طرف (E - Earth): بيتوصل بحربة التأريض المراد قياسها جوه غرفة التفتيش.
- طرف (C - Current Spike): بنوصله بوتد صلب وندقه في الأرض بعيد في خط مستقيم على مسافة كافية (D)، مثلاً 20 لـ 30 متر من الحربة المراد قياسها، والطرف ده بيمرر تيار اختبار جوه التربة.
- طرف (P - Potential Spike): بنوصله بوتد صلب تاني وندقه في الأرض بين الحربة (E) ووتد التيار (C) على نفس الخط المستقيم، والطرف ده بيقيس هبوط الجهد في التربة.
أوقات هتلاقي مسميات الأطراف على جهازك مكتوبة (E , S , H) بدل (E , P , C).. متقلقش هي هي بالضبط:
ال (E): هو الـ Earth (وسلكه غالباً أخضر).
ال (S): هو الـ Potential / Sensor (وسلكه أصفر).
ال (H): هو الـ Current / Heater (وسلكه أحمر).
============================
3. قاعدة الـ 62% الي بنحط على أساسها أطراف جهاز القياس:
لما بيمشي تيار بين (E) و (C)، بيتولد حوالين كل حربة منهم مجال كهربائي. عشان الوتد الأوسط (P) يقرأ المقاومة الحقيقية من غير ما يتأثر بالمجالين دول، الفيزياء بتقول إن مقاومة التربة بتستقر وتثبت عند مسافة تساوي 62% من المسافة الكلية (D).
طب ازاي تطبقها عملياً؟
لو دقيت وتد التيار (C) على بعد 30 متر من الحربة (E).
- اضرب 30 متر × 62% = 18.6 متر.
- ارفع الوتد (P) ودقه في الأرض على مسافة 18.6 متر من الحربة (E) على نفس الاستقامة.
- اقرأ الرقم الي على جهاز الاختبار، وهي دي المقاومة الفعلية للبئر.
- خذ قراءة ثانية عن طريق نقل الوتد (P) للخلف مسافة 10% (عند 52% = 15.6m)، وقراءة ثالثة بنقله للأمام 10% (عند 72% = 21.6m).
- طب ازاي تتأكد إن القراءة صحيحة 100%؟ 🤓✔️
لو كانت القراءات الثلاث متقاربة جداً مثلاً: 3.8 أوم، 4.0 أوم، 4.1 أوم، يبقى إنت تمام والقراءة مظبوطة تماماً ويتم اعتماد الـ 4.0 أوم. ✔️💯
بالنسبة لمسافة الـ 20 لـ 30 متر دي ممتازة وتكفي جداً لما تكون بتقيس حربة تأريض فردية (Single Rod).. لكن لو بتقيس شبكة أرضي كاملة متصلة ببعضها، المسافة الكلية (D) دي لازم تزيد وتكون حوالي 4 لـ 5 أضعاف أكبر بُعد في الشبكة، عشان تضمن إن الوتد (C) برة مجال الشبكة تماماً وتوصل لمنطقة ثبات المقاومة الحقيقية. ⚡
============================
أوعى تدق أوتاد الجهاز (P و C) في أسفلت أو خرسانة جافة؛ لازم تدقهم في تربة طينية أو رملية.
لو الأرض جافة جداً، صب شوية مية حوالين الوتد المساعد عشان تضمن التلامس مع التربة (بس أوعى تصب مية على حربة الأرضي الي بتقيسها أثناء القياس عشان متغشش القراءات. 😀❌
الأوتاد الثلاثة (E , P , C) لازم يكونوا على خط مستقيم تماماً. لو عملتهم على شكل مثلث أو زاوية مائلة، القراءة هتطلع غلط. ❌
============================
🟣 سؤال:
تخيل معايا المبنى راكب عليه نظام وقاية من الصواعق (Lightning Protection System - LPS) زي صاري مانعة الصواعق فوق السطح..
لما نيجي نعمل شبكة التأريض، بيبقى فيه خناقة:
هل نربط أرضي مانعة الصواعق بشبكة أرضي المبنى، ولا لازم نسيب أرضي الصواعق منفصل تماماً بأبيار خاصة بيه؟
وايه رأي الأكواد في ده؟ 🤔
الكهربائي الفصيح
