14/07/2026
على بالي باللي الانقطاع الكبير تاع التريسيتي (Blackout) لي قاس اليوم بين 8 إلى 10 ولايات خلى بزاف تساؤلات عند الناس. حبيت نفهموكم واش راه صاري في محيطنا بأسلوب بسيط وواضح، بعيد على التعقيدات الهندسية.
حبيت نحكيلكم حكاية واش صرا اليوم:
🔌 واشنو هو الـ "بلاك آوت" (Blackout)؟
ببساطة، البلاك آوت ماشي مجرد "كوبير" عادية تاع تريسيتي. هو انهيار مفاجئ للشبكة. كي تصرى صدمة قوية (مثلا تحبس محطة توليد كبيرة فجأة أو يطيح خط ضغط عالي)، الشبكة ما تقدرش تتحمل، فتطفى كوبلي كإجراء أمان باش تحمي الماتريال والمحطات الكبار من التلف.
⚖️ حكاية ميزان الـ "50 هرتز"
تخيلو شبكة الكهرباء الوطنية كيما ميزان حساس بزاف فيه كفتين:
▫️الكفة الأولى: "الإنتاج" (محطات التوليد)
▫️الكفة الدوزيام: "الاستهلاك" (الديار، الوزينات، الإدارات..)
هذا الميزان لازم ديما، وفي كل ثانية، يكون معدول في نقطة نسموها 50 هرتز. التريسيتي ما نقدروش نخبوها في الشبكة، يعني واش ننتجو درك، لازم نستهلكوه في دقيقتو. إذا زاد الاستهلاك فجأة أو نقص الإنتاج، الميزان يطيح تحت 50 هرتز. وإذا هبط بزاف وبزربة... تصرى الكارثة وتنهار الشبكة.
🛡️ وعلاش طفاو على بعض الولايات باش يحميو الباقي؟
شبكة الجزائر كامل مربوطة ببعضاها بخيوط الضغط العالي. بصح باش ما نطيحوش في ظلام شامل في كامل التراب الوطني، سيستام الحماية يخدم بعقلية "بابور غارق".
كي البابور يتقب ويدخلو الما، يغلقو البيبان على هداك الجزء باش ما يغرقش البابور كامل. نفس الشي في التريسيتي! السيستام كي شاف الميزان هبط بقوة اليوم، دار ديليستاج (Délestage) أوتوماتيكي... يعني قطع التريسيتي على ديك الولايات (ضحينا بجزء) باش نمنعو الشبكة الوطنية كامل تطيح.
لوكان ماكانش هاد السيستام، وطاحت الشبكة كامل في كل الولايات، باش نرجعوها كان راح يدينا أيام وأيام متواصلة تاع خدمة. يعني الانقطاع تاع اليوم، رغم المعاناة لي شفناها، كان في الحقيقة "رد فعل لحماية" الشبكة الوطنية من دمار أكبر.
ان شاء الله افدناكم بالشرح..
#سونلغاز #توعية
