17/06/2026
Në një moment delikat për të gjithë ne, heshtja nuk mund të jetë më një opsion.
Në mungesë të thellë të një reagimi qoftë nga shoqatat e arkitektëve, qoftë nga institucionet arsimore publike dhe private që edukojnë arkitektët e rinj ju ftoj të ngrini zërin: së pari si qytetarë të këtij vendi dhe së dyti si arkitektë.
Për t’u dhënë profesionistëve hapësirën e duhur për të qenë të pavarur në punën e tyre, për të qëndruar në këmbë pavarësisht stuhive politike dhe për të qenë pjesë proaktive në zhvillimin e vërtetë të vendit tonë.
Bashkohuni në protestë, për të mbrojtur ekosistemet e natyrës, që ju, së bashku me fëmijët tuaj, të keni mundësinë të shijoni natyrën e Shqipërisë. Bashkohuni për të kërkuar një zhvillim të qëndrueshëm, ku zhvillimi nuk është vetëm resorte me vila luksoze në zona të mbrojtura (ose jo), por hapësira publike të aksesueshme, infrastrukturë, natyrë, lidhje me kontekstin kulturor dhe mjedisin e ndërtuar, ose thjesht shtëpi të vogla B&B të projektuara nga vetë ju.
Mos prisni më të jeni studioja lokale e emrave VIP. Keni mundësinë të projektoni së bashku me klientin tuaj, sipas kërkesave dhe mundësive të tij, e jo sipas interesave politike.
Heshtja e arkitektëve nuk ka sjellë punë më të mirë. Përkundrazi, ka zhvlerësuar rolin tonë në formësimin e së ardhmes.
Sipas Pallasmaa: “Gjeometria e mendimit pasqyron gjeometrinë e dhomës.”
Imagjinoni çfarë mendësie do të ketë shoqëria e së ardhmes, nëse lejojmë vazhdimësinë e një ndërtimi të tillë.
Shihemi në orën 19:00 në Sheshin Skënderbej.
Shpresoj që ta doni këtë vend aq sa të luftoni për dinjitetin e profesionit tonë i cili ndërton, fizikisht dhe shpirtërisht, të ardhmen.
